މަޝްހޫރު ވިޔަފާރިވެރިޔާ އަދި މާމިގިލީ ދާއިރާގެ މެމްބަރު ގާސިމް އިބްރާހިމް, މި އަހަރާއި މިދިޔަ އަހަރު އދ. މާމިގިލިން 10 ބިމެއް ބައްލަވައިގެންކަން އޭނާގެ މާލީ ބަޔާނުން ހާމަވެއްޖެ އެވެ.
ވިހިވަނަ މަޖިލީހުގެ މެމްބަރުންގެ ދެވަނަ އަހަރުގެ މާލީ ބަޔާން މަޖިލީހުގެ ވެބްސައިޓުގައި މިހާރު ވަނީ ޝާއިއުކޮށްފަ އެވެ. އެއީ 28 މޭ 2025 އިން 27 މޭ 2026ގެ ބަޔާނެވެ.
ގާސިމްގެ މާލީ ބަޔާނުގައިވާ ގޮތުން އޭނާގެ އަތުގައި ރާއްޖޭގައި 47 ބިން އަދި ސިންގަޕޫރުގައި ފްލެޓެއް އެބަ އޮތެވެ. އޭގެ ތެރެއިން 38 ބިމަކީ އދ. މާމިގިލިން ބައްލަވައިގެން ބިމެވެ.
މާލީ ބަޔާނުގައިވާ ގޮތުން ގާސިމް ވަނީ މިދިޔަ އަހަރު މާމިގިލިން ހަ ބިމެއް ބައްލަވައިގެންފަ އެވެ. އެ ބިންތަކުގެ ޖުމުލަ އަގަކީ 7.6 މިލިއަން ރުފިޔާ އެވެ. އެ ބިންތަކަކީ:
- އދ. މާމިގިލި/ ނިއުހޯޕް: 1.1 މިލިއަން ރުފިޔާ
- އދ. މާމިގިލި/ ޕެރިވިންކަލް: 600,000 ރުފިޔާ
- އދ. މާމިގިލި/ ގަސްކުރި: 859,350 ރުފިޔާ
- އދ. މާމިގިލި/ އިރާކް: 1.9 މިލިއަން ރުފިޔާ
- އދ. މާމިގިލި/ ޑީޕްކޮރަލް: 1.7 މިލިއަން ރުފިޔާ
- އދ. މާމިގިލި/ ބުލޫހައުސް: 1.3 މިލިއަން ރުފިޔާ
އޭގެ އިތުރުން މިއަހަރު މާމިގިލިން އިތުރު ހަތަރު ބިމެއް ބައްލަވައިގެން ކަމަށް މާލީ ބަޔާނުގައި އޭނާ ވިދާޅުވެފައިވެ އެވެ. އެއީ:
- އދ. މާމިގިލި/ މެރީގޯލްޑް: 1.3 މިލިއަން ރުފިޔާ
- އދ. މާމިގިލި/ ޖަނބުރޯލްގަސްދޮށުގެ: 885,450 ރުފިޔާ
- އދ. މާމިގިލި/ ރެވި: 800,000 ރުފިޔާ
- އދ. މާމިގިލި/ ދިވެހިގެ: 1.3 މިލިއަން ރުފިޔާ
