އީރާނުގެ ތާއީދާއެކު ޔަމަނުގައި ހަރަކާތްތެރިވާ ހޫޘީ ހަނގުރާމަވެރިންގެ ބާރުގެ ދަށުގައިވާ ސަރަހައްދުތައް މިނިވަންކޮށް، މުޅި ގައުމުގައި ދައުލަތުގެ ބާރު ދެމެހެއްޓުމަށްޓަކައި އަސްކަރީ އޮޕަރޭޝަނެއް ފަށާފައިވާކަމަށް ޔަމަނުގެ ރިޔާސީ ލީޑަރޝިޕް ކައުންސިލްގެ ރައީސް ރަޝާދު އަލް-އަލީމީ، އާދީއްތަ ދުވަހު ވިދާޅުވެއްޖެއެވެ.
އަލް-އަލީމީ ވިދާޅުވީ، ސުލްހަވެރިކަމާއި އެކު ވާހަކަދައްކައިގެން މައްސަލަ ހައްލުކުރުމަށް ހޫޘީންނަށް ދެވުނު ހުރިހާ ފުރުސަތުތަކެއްގެ ބޭނުން އެފަރާތްތަތަކުން ހިފާފައިނުވާކަމަށާއި އެހެންކަމުން ބާރުގެ ބޭނުންކޮށްގެން ގައުމު މިނިވަން ކޮށް ގައުމުގެ ސުލްހަމަސަލަސް ކަން ގާއިއުމުކުރުމަށް މިހާރު ޔަމަނުގެ ދިފާއީ ބާރުތަކަށް އަމުރުކޮށްފައިވާ ކަމަށެވެ. އަދި ޔަމަން މިހާރު އޮތީ ދައުލަތުގެ ބާރު އަލުން އިއާދަކުރުމަށްޓަކައި ތައްޔާރުވުމުގެ މަރުހަލާ ނިންމައި، އަމަލީ މައިދާނަށް ނުކުމެ ކަމަށްވެސް އަލް އަލީމީ ބަޔާންކުރެއްވިއެވެ.
އަލް އަލީމީގެ މި އެންގެވުމަކީ ޔަމަނުގެ ދިގުލާފައިވާ ދާޚިލީ ހަނގުރާމަ ފާއިތުވި ހަފުތާތަކުގައި އިތުރަށް ވަރުގަދަވެފައިވާ ދަނޑިވަޅެއްގައި، އާންމުކޮށްފައިވާ އެނެްގުމެކެވެ.
އަލްޢަލީމީ ވިދާޅުވީ، ސަރުކާރުން ޞުލްޙައަށް ދެވެން އޮތް ހުރިހާ ފުރުޞަތެއް ދިން ނަމަވެސް، ޙޫޘީން ހަނގުރާމަ އިތުރަށް ގޯސްކޮށް، އަވަށްޓެރި ޤައުމުތަކަށް އަމާޒުކޮށް ހަމަލާދީ، ބައިނަލްއަޤްވާމީ ކަނޑުގެ މަގުތަކަށް ނުރައްކާ ކުރަމުންދާ ކަމަށެވެ.
އޭނާ ވިދާޅުވި ގޮތުގައި، ޙޫޘީ ހަނގުރާމަވެރިންނާއެކު މަޝްރަޙު ފިނިކުރުމަށް އޮތް ހުރިހާ ފުރުޞަތެއް މިހާރު ނިމިފައިވާކަމަށެވެ.
މީގެ އިތުރުން އަލްޢަލީމީ ފާހަގަކުރެއްވި ގޮތުގައި، މި އަސްކަރީ ހަރަކާތްތަކަކީ ޞަންޢާ، ޙުދައިދާ އަދި ޞަޢްދާ ހިމެނޭހެން ޙޫޘީންގެ ކޮންޓްރޯލްގެ ދަށުގައިވާ ސަރަޙައްދުތަކުގައި ދިރިއުޅޭ އާންމު ރައްޔިތުންނަށް ނުވަތަ ވަކި ޤަބީލާއަކަށް އަމާޒުކޮށްގެން ހިންގާ ހަރަކާތްތަކެއް ނޫނެވެ.
ޙޫޘީންގެ ބާރުގެ ދަށުގައިވާ ސަރަޙައްދުތަކުގައި ދިރިއުޅޭ ރައްޔިތުންނާ މުޚާޠަބު ކުރައްވަމުން، ޙޫޘީންގެ އަސްކަރީ މަރުކަޒުތަކާ ދުރަށް ދިއުމަށާއި، އެމީހުންގެ ދަރިން ހަނގުރާމައިގެ ތެރެއަށް ވެއްދިޔަ ނުދިނުމަށާއި، ސަރުކާރުގެ އަސްކަރީ އަދި ސަލާމަތީ ބާރުތަކަށް އެއްބާރުލުން ދިނުމަށްވެސް އޭނާ ވަނީ އިލްތިމާސް ކޮށްފައެވެ.
