ކެންސަރު ފަރުވާއަށްފަހު މިނިސްޓަރު ރަމީލާ އެނބުރި މަސައްކަތަށް، ދިން ލޯތްބާއި ދުއާތަކަށް ޝުކުރު

ރާއްޖެއިން ބޭރުން ކެންސަރަށް ފަރުވާ ހޯދެއްވުމަށް ފަހު އެގްރިކަލްޗާ މިނިސްޓަރު ޑރ. އައިޝަތު ރަމީލާ މިއަދު އޮފީހަށް ނުކުންނަވަން ފައްޓަވައިފި އެވެ.

ކެންސަރު ޖެހިވަޑައިގެންފައިވާކަން އިއުލާން ކުރެއްވުމަށްފަހު އެ ބައްޔަށް ފަރުވާ ހޯއްދެވުމަށް ރަމީލާ ރާއްޖެއިން ބޭރަށް ފުރާވަޑައިގެންނެވީ މިދިޔަ ނޮވެމްބަރު މަހުގެ ފަހުކޮޅުގަ އެވެ. އޭރު ރަމީލާ ވިދާޅުވީ، ކެންސަރު ބަލި ހުރީ އެޑްވާންސް ސްޓޭޖުގައި ކަމަށެވެ.

ފަރުވާއަށް ފަހު އަލުން މަސައްކަތަށް ނުކުންނެވުމަށްފަހު ސޯޝަލް މީޑިއާގައި ރަމީލާ މިއަދު ކުރެއްވި ޕޯސްޓެއްގައި ވިދާޅުވީ، ލޯބިވާ މީހުންގެ ކައިރިއަށް ގެއަށް އާދެވުމުން އުފާ ކުރައްވާ ކަމަށެވެ.

”މާބޮޑު ސައިޑް އިފެކްޓެއް ނެތި ނުވަ ކީމޯތެރަޕީ ސެޝަން ނިމިއްޖެ. ފަރުވާގެ ދެވަނަ ފިޔަވަހި ފެށުމުގެ ކުރިން އޮތް މަދު ހަފުތާގެ ބޭނުން ރަނގަޅު ގޮތުގައި ހިފުމަށް އުންމީދުކުރަން. ދެއްވި ލޯތްބާއި ދުވާތަކާއި ހެޔޮ އެދުންތަކަށް އެންމެނަށް ޝުކުރު އަދާކުރަން،“ ރަމީލާ ވިދާޅުވެފައިވެ އެވެ.