އެމްއޭސީއެލް އެމްޑީގެ ވެހިކަލް ވަގަށް ނެގިކަމުގެ ތުހުމަތުގައި ބަޔަކު ހައްޔަރުކޮށްފި

މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މެނޭޖިން ޑިރެކްޓަރު އިބްރާހީމް ޝަރީފުގެ ވެހިކަލް ވަގަށް ނެގި މައްސަލާގައި ހިމެނޭ ބަޔަކު ހައްޔަރުކޮށްފި އެވެ.

އެނގިފައިވާ ގޮތުގައި އެ ވެހިކަލް ވަގަށް ނެގީ މިދިޔަ ހަފުތާ ތެރޭގަ އެވެ. އެ ވެހިކަލް ހޯދާފައިވަނީ މިދިޔަ އަންގާރަ ދުވަހު އެވެ.

ފުލުހުން މިއަދު ބުނީ އެމްއޭސީއެލްގެ ވެހިކަލްއެއް ގެއްލިފައިވާ މައްސަލަ ރިޕޯޓު ކުރި ކަމަށާއި އެ ވެހިކަލް ގެއްލުނު މައްސަލައިގައި ތުހުމަތު ކުރެވޭ ބަޔަކު ހައްޔަރު ކޮށްފައިވާ ކަމަށެވެ. ނަމަވެސް ހައްޔަރުކޮށްފައި ވަނީ ކިހާ އަދަދެއްގެ މީހުން ކަމެއް ހާމައެއް ނުކުރެ އެވެ.

އެ މައްސަލައިގެ އިތުރު ތަފްސީލެއް ނުދީ ފުލުހުން ބުނީ އެ މައްސަލަ އިތުރަށް ތަހުގީގުކުރަމުންދާ ކަމަށެވެ.