20ވަނަ މަޖިލީހުގެ ފުރަތަމަ ކުއްލި މައްސަލަ: އައްޑޫއިން ފެނުގެ ހިދުމަތް މެދުކެނޑޭ މައްސަލަ

އައްޑޫގެ ރަށްތަކުން ފެނުގެ ހިދުމަތް މެދުކެނޑޭ މައްސަލަ ސަރުކާރުގެ ސަމާލުކަމަށް ގެނައުމުގެ ގޮތުން އެ މައްސަލަ ރައްޔިތުންގެ މަޖިލީހަށް މިއަދު ހުށަހަޅައިފިއެވެ.

މިއީ 20 ވަނަ މަޖިލީހަށް ހުށަހެޅި ފުރަތަމަ ކުއްލި މައްސަލައެވެ. އެ މައްސަލަ މަޖިލީހަށް ހުށަހެޅުއްވީ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް އެވެ. ނާޒިލް ހުށަހެޅުއްވި ކުއްލަ މައްސަލަ ބަލައިގަތުމަށް ޕީއެންސީގެ މެޖޯރިޓީ އޮންނަ މަޖިލީހުން ވަނީ ނިންމައިފައެވެ.

މި ސަރުކާރުން ވަނީ އައްޑޫގެ ފެނުގެ ނިޒާމް ރަނގަޅުކުރުމުގެ ޕްރޮޖެކްޓް، އެމްޑަބްލިއުއެސްސީއާ ހަވާލުކޮށްފަ އެވެ.

މަޖިލީހަށް ހުށަހެޅުއްވި ކުއްލި މައްސަލައިގައި ނާޒިލް ވަނީ ސާފު ފެން ފޯރުކޮށްދިނުމުގެ ހިދުމަތަކީ އަސާސީ ހިދުމަތެއް ކަން ފާހަގަކުރައްވައި، ދިމާވެފައިވާ ދަތިތައް މިހާރުން މިހާރަށް ހައްލުކުރަން ގޮވާލައިފަ އެވެ.

ނާޒިލް ވިދާޅުވީ ފެނުގެ ހިދުމަތަށް ބުރޫ އަރާފައިވާތީ، ރައްޔިތުންނަށް އިންތިހާއަށް ގެއްލުންތައް ވަމުންދާ ކަމަށެވެ.