ގަވާއިދާ ޚިލާފަށް މީހުން އަރުވައިގެން އެއަރޕޯޓަށް ދަތުރުކުރަމުންދިޔަ އުޅަނދެއް ޓޯކޮށްފި

ގަވާއިދާ ޚިލާފަށް މީހުން އަރުވައިގެން ވެލާނާ އިންޓަރނޭޝަނަލް އެއަރޕޯޓަށް ދަތުރުކުރަމުންދިޔަ އުޅަނދެއް ޓޯކޮށްފިއެވެ.

ދިވެހި ފުލުހުންގެ ޚިދުމަތުން ވިދާޅުވި ގޮތުގައި ހުއްދަނެތި، ގަވާއިދާ ޚިލާފަށް މީހުން އަރުވައިގެން މާލެއިން އެއަރޕޯޓަށް ދަތުރުކުރި އުޅަނދެއް ބަލައި ޗެކް ކުރިއިރު އެ އުޅަނދަކީ ”ބީ“ ޒޯންގައި ރަޖިސްޓްރީކޮށްފައިވާ އުޅަނދެއް ކަމަށެވެ. އެ އުޅަނދު ”އޭ“ ޒޯންގައި ދުއްވާއިރު އުޅަނދުގެ އަހަރީ ފީވެސް ހަމަވެފައިވާކަމަށް ފުލުހުން ވިދާޅުވިއެވެ. އަދި އެ އުޅަނދު ފުލުހުން ވަނީ މިހާރު ޓޯ ކޮށްފައެވެ.

ގަވާއިދާ ޚިލާފަށް މީހުން އަރުވައިގެން ދަތުރުކުރަމުންދިޔަ ދެ ޕިކަޕެއް މިދިޔަ ހަފްތާގައިވެސް ފުލުހުން ވަނީ ހުއްޓުވައި ޗެކްކޮށްފައެވެ. އަދި އެ ވެހިކަލްތައް ދުއްވި ޑްރައިވަރުންގެ ލައިސަންސް ވަނީ ހިފަހައްޓާފައިވާއިރު އެތަނުން އެއް ޕިކަޕް ފުލުހުންގެ ބެލުމުގެ ދަށަށް ގެންގޮސްފައިވާކަމަށް ފުލުހުންވަނީ ބުނެފައެވެ.