ހުޅުމާލެއާއި މާލޭގެ ފެނުގެ ވިޔުގަ ގުޅާލުން: މާލޭގެ ޕަމްޕް ސްޓޭޝަންގެ މަސައްކަތް ފަށައިފި

ސިނަމާލެ ބުރިޖު މެދުވެރިކޮށް ހުޅުމާލެއާއި މާލޭގެ ފެނުގެ ވިޔުގަ ގުޅާލުމުގެ މަޝްރޫއުގައި ހިމެނޭ، މާލޭ ޓްރާންސްފާ ޕަމްޕް ސްޓޭޝަން ގާއިމުކުރުމުގެ އަމަލީ މަސައްކަތް ފަށައިފި އެވެ.

މާލޭ ވޯޓާ އެންޑް ސްވަރޭޖް ކަމްޕެނީ (އެމްޑަބްލިޔުއެސްސީ)ގެ ”ވޯޓާ ސެކިއުރިޓި ޕްލޭން“ގެ ދަށުން ކުރިއަށް ގެންދާ މި މަޝްރޫއުއަކީ އެމްޑަބްލިޔުއެސްސީގެ ”ވޯޓާ ސެކިއުރިޓި ޕްލޭން“ގެ ދަށުން 2016 ވަނަ އަހަރު ފެށުމަށްފަހު އެކި ސަބަބުތަކާހުރެ މިހާތަނަށް މަޑުޖެހިފައި އޮތް މަޝްރޫއެކެވެ.

އެމްޑަބްލިޔުއެސްސީ އިން ބުނީ، މި މަޝްރޫއު ނިމުމުން ސިނަމާލެ ބްރިޖުމަތީގައި އަޅާފައިވާ ހޮޅިމެދުވެރިކޮށް މާލެއާއި ހުޅުމާލޭގެ ފެނުގެ ވިއުގަ ގުޅުވާލެވޭނެ ކަމަށެވެ. އޭގެ ސަބަބުން ބޭނުންވެއްޖެ ހާލަތެއްގައި، މާލެއިން ހުޅުމާލެއަށް ނުވަތަ ހުޅުމާލެ އިން މާލެއަށް ގަޑިއަކު 800 ޓަނުގެ ފެން ޕަމްޕުކުރުމުގެ ގާބިލުކަން އެ ކުންފުންޏަށް ލިބިގެންދާނެ ކަމަށް ބުންޏެވެ.

އަދި އެކަމުގެ ސަބަބުން މާލޭ ސަރަހައްދުގައި އެމްޑަބްލިޔުއެސްސީ އިން ފޯރުކޮށްދޭ ސާފު ބޯފެނުގެ ހިދުމަތުގެ ކަށަވަރުކަން އިތުރުވެގެންދާނެ ކަމަށްވެސް އެމްޑަބްލިޔުއެސްސީ އިން ބުންޏެވެ.

ޖުމުލަ 3.8 މިލިއަން ރުފިޔާ ހަރަދުކޮށްގެން ކުރިއަށް ގެންދާ މި މަޝްރޫއު ނިންމައި ހިދުމަތް ދޭން ފަށަން ތާވަލުކޮށްފައިވަނީ މި އަހަރުގެ ނިޔަލަށެވެ.

މަޝްރޫއުގެ ދަށުން މާލޭގެ ޓްރާންސްފާ ޕަމްޕް ސްޓޭޝަން ހަދަނީ ރައީސް އޮފީހުގެ ނާސަރީގެ މަސައްކަތް ކުރިން ކުރަމުން އައި މާލޭގެ 64 ނަމްބަރު ކޮށީގަ އެވެ. އެ ޕަމްޕު ސްޓޭޝަންގެ އިތުރުން އެ މަޝްރޫއުގައި ހިމެނޭ އެހެން ބައިތަކަކީ ސިނަމާލެ ބްރިޖުމަތީގައި އަޅާފައިވާ 225 ކިލޯ މީޓަރު ދިގު ހޮޅިލައިންއާއި  ހުޅުމާލޭގައި ގާއިމުކުރެވޭ ޓްރާންސްފާ ޕަމްޕް ސްޓޭޝަނެވެ.

އެމްޑަބްލިޔުއެސްސީ އިން ބުނީ މި މަޝްރޫއުގެ ދަށުން ބްރިޖު މެދުވެރިކޮށް ހޮޅި ލައިން އެޅުމާއި ޕްރެޝަރު ޓެސްޓުކުރުމުގެ މަސައްކަތް ނިމިފައިވާ ކަމަށެވެ. އަދި ހުޅުމާލޭގެ ޕަމްޕް ސްޓޭޝަންގެ މަސައްކަތްތައް ފަށާފައިވާ ކަމަށް ބުންޏެވެ.