ރ. އުނގޫފާރުގައި ބަޔަކު ކަރަންޓުގައި ޖެހުނު މައްސަލައިގައި ފެނަކަ ކޯޕަރޭޝަނުން އިހުމާލުވެފައިވާތީ އެ ކުންފުނި ޖޫރިމަނާ ކުރަން ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ) އިން މިއަދު ނިންމައިފި އެވެ.
އުނގޫފާރުގައި ކުޑަ ކުދިންތަކެއް ކަރަންޓުގައި ޖެހުނީ މިދިޔަ މެއި މަހުގެ 23 ވަނަ ދުވަހު އެވެ. އެ ހާދިސާގައި ކަރަންޓުގައި ޖެހުނު ކުއްޖަކު ސަލާމަތްކުރަން އުޅުމުގެ ތެރޭގައި ކަރަންޓު ޖެހިގެން 18 އަހަރުގެ ޒުވާނަކު ވަނީ މަރުވެފަ އެވެ. އޭނާ މަރުވީ ހާލު ސީރިއަސްވި އައިޖީއެމްއެޗްގައި ފަރުވާ ދެމުންދަނިކޮށް ޖޫން 10 ވަނަ ދުވަހު އެވެ.
އެ ހާދިސާ ހިނގިތާ ދެ މަސް ފަހުން ޔުޓިލިޓީ ރެގިއުލޭޓަރީ އޮތޯރިޓީ މިއަދު ނެރުނު ނޫސް ބަޔާނެއްގައި ބުނީ، ސޯޝަލް މީޑިއާ އިން އެ ހާދިސާގެ މައުލޫމާތު ލިބުމުން އެ މައްސަލަ ތަހުގީގުކުރި ކަމަށެވެ.
އެގޮތުން އެ ހާދިސާ ހިނގަން މެދުވެރި ސަބަބަކީ މަގު ބައްތިތަކުގައި ހުންނަންޖެހޭ ސަލާމަތީ އިކުއިޕްމަންޓްތަކުގެ ތެރޭގައި ހިމެނޭ އާތު ލީކް ސާކިޓް ބްރޭކާ (އީއެލްސީބީ) އާއި މިނިއޭޗާ ސާކިޓް ބްރޭކާ (އެމްސީބީ) ހަރުކުރެވިފައިނުވާ މަގު ބައްތިތަކަށް ފެނަކަ ކޯޕަރޭޝަނުން ކަރަންޓު ދީފައި ހުރުމުން ކަމަށް އެ އޮތޯރިޓީން ބުންޏެވެ.
”މި ތަހުގީގުން އިތުރަށް ހާމަވެގެންދިޔަ ގޮތުގައި ފެނަކަ ކޯޕަރޭޝަން ލިމިޓެޑުން ކަރަންޓުގެ ހިދުމަތް ދެމުންގެންދާ ވަރަށް ގިނަ ރަށްތަކުގެ މަގު ބައްތިތަކުގައި އާތު ލީކް ސާކިޓް ބްރޭކާ ބްރޭކާ ’އީއެލްސީބީ‘ ހަރުކުރެވިފައެއް ނުވެއެވެ،“ ޔުޓިލިޓީ ރެގިއުލޭޓަރީ އޮތޯރިޓީން ބުންޏެވެ.
އެ އޮތޯރިޓީން ބުނީ، އުނގޫފާރުގައި ހިނގި އެ ހާދިސާއަކީ އެ ރަށުގެ މަގުބައްތިތަކަށް ކަރަންޓު ދިނުމުގައި ހުންނަންޖެހޭ ސަލާމަތީ ކަންކަމާމެދު ފެނަކަ އިހުމާލުވުމުން ހިނގާފައިވާ ކަމެއް ކަމަށް ސާބިތުވާތީ، އެ ކުންފުނި 50،000 ރުފިޔާ އިން ޖޫރިމަނާ ކުރަން އިއްޔެ ނިންމާފައިވާ ކަމަށެވެ.
އަދި އެ ފައިސާ ސަރުކާރު ބަންދު ނޫން 30 ދުވަހުގެ ތެރޭގައި ދެއްކުމަށް އެ ކުންފުންޏަށް އަންގާފައިވާނެ ކަމަށްވެސް ބުންޏެވެ.
އޮތޯރިޓީން ބުނީ، ފެނަކައިން ކަރަންޓުގެ ހިދުމަތް ފޯރުކޮށްދޭ ރަށްރަށުގެ ތެރެއިން މަގު ބައްތިތަކުގައި އާތު ލީކް ސާކިޓް ބްރޭކާ އާއި މިނިއޭޗާ ސާކިޓް ބްރޭކާ ހަރުނުކޮށް ހުރި ނަމަ އެ ތަކެތި ސަރުކާރު ބަންދު ނޫން 30 ދުވަހުގެ ތެރޭގައި ހަރުކޮށް މަގު ބައްތިތަކުގެ ރައްކާތެރިކަން ކަށަވަރު ކުރުމަށާއި އެ މުއްދަތުގެ ތެރޭގައި އެކަން އިސްލާހު ނުކުރެވިއްޖެ ނަމަ، އެކަންކޮށް ނިމެންދެން މަގު ބައްތިތައް ނުދިއްލަން ފެނަކައަށް އަންގާފައިވާނެ ކަމަށެވެ.
80 Comments
ގުޅުންހުރި
މެންބަރުކަން ގެއްލުވާލުމުގެ ބާރު ސިޔާސީ ޕާޓީއަށް ދިނުމުން ރައްޔިތުންގެ ބާރު ގެއްލޭ:
ސްޓެލްކޯގެ ފުރިހަމަ މަސައްކަތެއް؛ އިސްލާމީ މަރުކަޒުގެ މަސްފެންގަނޑު މަރާމާތުކޮށް ރީތިކޮށްލައިފި
އައިކޮމްގެ އަޑުއެހުމަށް ހާޒިރުނުވުމުން ހައުސިން މިނިސްޓްރީ ޖޫރިމަނާކޮށްފި
މަނާކުރަންވީ ފަލަސްތީނުގައި ގަތުލުއާންމު ހިންގާ މީހުންގެ ޕާސްޕޯޓް އެކަނި: ނާޒިމް
މަޖިލީހުގެ ގާނޫނީ ހައިސިއްޔަތާ މެދު ސުވާލު އުފެދިއްޖެ، ކޯޓަށް ދާން މަޝްވަރާކުރާނަން:
އިޒްރޭލު ޕާސްޕޯޓް މަނާކުރާ ބިލާ ގުޅޭ ގަރާރު ބޭރުކުރީ އެމްޑީޕީގެ ހެޔޮނިޔަތް