މަހަކު 40،500 މުސާރައެއް ލިބޭގޮތަށް ބާ ކައުންސިލަށް އެސްޖީއަކު ހޯދަނީ

މަހަކު 40،500 ރުފިޔާގެ ބޮޑު މުސާރައެއް ލިބޭގޮތަށް ބާ ކައުންސިލަށްސެކެޓްރީ ޖެނަރަލަކު ހޯދަން އިއުލާންކޮށްފި އެވެ.

ބާ ކައުންސިލުން ކުރި އިއުލާނެއްގައި ބުނީ، އެސްޖީއަކު ހޯދުމަށް މި މަހުގެ ފަސް ވަނަ ދުވަހު ވެސް އިއުލާނުކުރި ކަމަށާއި ނަމަވެސް އެކަށީގެންވާ ތަރުހީބެއް ލިބިފައިނުވާތީ އަނެއްކާވެސް ހޯދަން އިއުލާންކުރާ ކަމަށެވެ.

އެސްޖީއަކު ކަނޑައަޅަނީ އެއް އަހަރު ދުވަހުގެ މުއްދަތަށް ކަމަށް ބާ ކައުންސިލުން ބުންޏެވެ. އެ މަގާމުގެ މުސާރައަށް މަހެއްގެ މައްޗަށް 40،500 ރުފިޔާ ލިބޭނެ ކަމަށާއި މަސައްކަތާ ގުޅުވައި އެހެނިހެން އެލެވެންސާއި ރޯދަ އެލެވެންސާއި ރާއްޖޭގެ ޕެންޝަނާ ބެހޭ ގާނޫނުގެ ދަށުން ލިބިދެވޭ ޕެންޝަން ކޮންޓްރިބިއުޝަން ލިބޭނެ ކަމަށް ބާ ކައުންސިލުން ބުންޏެވެ.

އެސްޖީގެ މަގާމަށް ކުރިމަތިލާ މީހެއްގެ ކިބައިގައި ހުންނަޖެހޭ ޝަރުތުތައް:

ގާނޫނީ ދާއިރާއިން ފުރަތަމަ ޑިގްރީ ހާސިލްކޮށްފައި ވުން
ގާނޫނީ ވަކީލެއްގެ ގޮތުގައި ހަތް އަހަރުގެ ތަޖުރިބާ ލިބިފައިވުން
ގާނޫނީ ދާއިރާގައި ކޮށްފައިވާ މަސައްކަތްތަކުގެ ތެރޭގައި އެ މީހެއްގެ ނަޒާހަތްތެރިކަމާމެދު ސުވާލު އުފެދޭ ފަދަ މައްސަލައެއް ކޯޓަކަށް ނުވަތަ ބާކައުންސިލަށް ސާބިތުވެފައިވާ މީހެއް ކަމުގައިނުވުން
ބަނގުރޫޓުވެފައިވާ މީހެއް ކަމުގައި ނުވުން
ޖިނާއަތުގެ ކުށެއް ސާބިތުވެފައިވާ މީހެއް ކަމުގައި ނުވުން
އިއުލާނުގައި ބުނެފައިވާ ގޮތުގައި، ކުރިން އެސްޖީއަކު ހޯދަން މީގެކުރިން ކުރި އިއުލާނަށް ފޯމު ހުށަހެޅި ފަރާތްތަކަށް މިފަހަރު ފޯމު ހުށަހަޅާކަށް ނުޖެހޭނެއެވެ.

އެ އިއުލާނުގެ މުއްދަތު ހަމަވަނީ މި މަހުގެ 26 ވަނަ ދުވަހުގެ މެންދުރު 12:00 އަށެވެ.