ހޮޅުދޫން މަރުވެފައިވާ އަންހެނެއް ފެނިއްޖެ، ހަށިގަނޑުގައި ޒަހަމްތަކެއް

ނ. ހޮޅުދޫގައި ނިޔާވެފައި އޮތް ދިވެހި އަންހެނަކު ފެނިއްޖެ ކަމަށް ފުލުހުން ބުނެފި އެވެ.

ފުލުހުން މިއަދު ބުނީ ހޮޅުދޫގައި ޒަހަމްތަކަކާ އެކު، އަންހެނަކު އޮތްކަމުގެ ރިޕޯޓު މިއަދު ހެނދުނު 10:10 ގައި ލިބިގެން ފުލުހުން އެޓެންޑްވި ކަމަށެވެ. އެ މީހާ ހޮޅުދޫ ހެލްތު ސެންޓަރަށް ގެންދިޔަ އިރުވެސް މަރުވެފައިވާ ކަމަށް ހެލްތު ސެންޓަރުން ވަނީ މައުލޫމާތު ދީފައި ކަމަށް ފުލުހުން ބުންޏެވެ.

އެނގިފައިވާ ގޮތުގައި މަރުވެފައިވަނީ އެ ރަށު 50 އަހަރުގެ ޒަކިއްޔާ މޫސާ އެވެ. އޭނާގެ ދެ ކުއްޖަކާއި ދެ މާމަ ކުދިން އަދި ފިރިއެއް ވެސް ހުރެ އެވެ.

ޒަކިއްޔާ މަރުވެފައި އޮތްއިރު އޭނާގެ ހަށިގަނޑު ކައިރީގައި މަސް ކަނޑަން ގެންގުޅޭ ވަޅިއެއް އޮތެވެ.

ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.