ރާއްޖޭގައި މިހާރު ކުރިއަށްދާ 15 ވަނަ ވޯލްޑް ބޮޑީބިލްޑިން އެންޑް ފިސީކް ސްޕޯޓްސް ޗެމްޕިއަންޝިޕް ކެންސަލް ނުކުރީ ރާއްޖެއަށް މާލީ ގޮތުން ލިބިދާނެ ގެއްލުންތަކަށް ވިސްނުމަށްފަހު ކަމަށް އެ މުބާރާތް އިންތިޒާމުކުރާ ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) އިން ބުނެފި އެވެ.
ރާއްޖޭގައި މީގެ ކުރީންވެސް ބޮޑީބިލްޑިން މުބާރާތްތަކެއް ބާއްވާފައިވެ އެވެ. ނަމަވެސް މިފަހަރުގެ މުބާރާތަށް މާބޮޑު ފާޑުކިޔުންތަކެއް އަމާޒުވެފައިވަނީ، ކޮންމެ ޖިންސެއް ވިޔަސް، ހަށިގަނޑު ހާމަކޮށްގެން ކުރާ މަސައްކަތަކުން ރީތި ނަމެއް ނުލިބޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެފައި ވަނިކޮށް އެ މުބާރާތް ބޭއްވުމުންނެވެ.
ފާޑުކިޔުންތަކާ ގުޅިގެން ބީބީއޭއެމް އިން މިއަދު ނެރުނު ނޫސް ބަޔާނެއްގައި ބުނީ، އެ އެސޯސިއޭޝަންގެ ފަރާތުން އެފަދަ ބައިނަލްއަގުވާމީ މުބާރާތެއް ހޮސްޓް ކުރުމަށް މަސައްކަތް ކުރީ ރާއްޖޭގެ ޕްރޮފައިލް ބައިނަލްއަގުވާމީ ކުޅިވަރުގެ ދުނިޔޭގައި ވަރުގަދަ ކުރުމަށާއި އެކަމުގެ ސަބަބުން ރާއްޖޭގެ އިގުތިސާދަށާއި ޓޫރިޒަމަށް ލިބޭނެ ކުރިއެރުމަށް ވިސްނައިގެން ކަމަށެވެ.
”މުބާރާތް ބޭއްވުމަށް ވޯލްޑް ބޮޑީބިލްޑިން އެންޑް ފިސީކް ސްޕޯޓްސް ފެޑެރޭޝަން އާއި އެ މުބާރާތް ބޭއްވުމަށް ކޮންޓްރެކްޓް ހެދުމަށްފަހު ރާއްޖޭގައި މި މުބާރާތް ބޭއްވުން ކެންސަލްކޮށްފި ރާއްޖޭގެ ކުޅިވަރު އެސޯސިއޭޝަންތަކަށާއި ޖުމުލަ ގޮތެއްގައި ރާއްޖެއަށް މާލީ ގޮތުންނާއި އެހެނިހެން ގޮތްގޮތުން ލިބިދާނެ ގެއްލުންތަކަކަށް ވިސްނުމަށްފަހު މި އެސޯސިއޭޝަންގެ ފަރާޓުން އެ މުބާރާތް ބޭއްވުމަށް ނިންމީ އެވެ،“ ބީބީއޭއެމްގެ ބަޔާނުގައި ބުނެފައިވެ އެވެ.
އެ އެސޯސިއޭޝަނުން އިތުރަށް ބުނީ، އެ މުބާރާތް ކުރިއަށް ގެންދިއުމަށްޓަކައި ރައީސް ޑރ. މުހައްމަދު މުއިއްޒުގެ ތަސައްވުރާއި ސްޕޯޓްސް މިނސްޓްރީން އިރުޝާދު ދިން ގޮތަށް ކުރިއަށް ގެންދިއުމަށް މަސައްކަތް ކުރި ކަމަށެވެ.
”ނަމަވެސް މި މުބާރާތާ ގުޅިގެން ފެތުރެމުންދާ ހަބަރުތަކާއި ގުޅިގެން އާންމު ރައްޔިތުންގެ ކަންބޮޑުވުން ހުރުމާއެކު ރައީސުލްޖުމްހޫރިއްޔާ ޑޮކްޓަރު މުހައްމަދު މުއިއްޒު އާއި ދިވެހި ލޮބުވެތި ރައްޔިތުންގެ ފަރާތުން ނިޔާހަތަށް މައާފަށް އެދެމެވެ. އަދި މުސްތަގުބަލުގައި މިފަދަ ކަމެއް ތަކުރާރު ނުވާނެކަމުގެ ފުރިހަމަ ޔަގީންކަން ރައްޔިތުންނަށް އަރުވަމެވެ،“
23 Comments
ގުޅުންހުރި