ރައީސް ނަޝީދަށް ގްލޯބަލް ސިޓިޒަން އެވޯޑް ލިބިވަޑައިގެންފި

އިންޓަނޭޝަނަލް ރެސިޑެންސް އެންޑް ސިޓިޒެންޝިޕް އެޑްވައިޒަރީ ފާމު ހެންލީ އެންޑް ޕާޓްނާޒް އިން ދޭ ގްލޯބަލް ސިޓިޒަން އެވޯޑު ކުރީގެ ރައީސް މުހައްމަދު ނަޝީދުއަށް ލިބިވަޑައިގެންފި އެވެ.

ސްވިޒަލޭންޑުގެ އެންޖީއޯއެއް ކަމަށްވާ އަންޑަން ފައުންޑޭޝަނާ ގުޅިގެން ހެންލީ އެންޑް ޕާޓްނާޒް އިން ދޭ މި އެވޯޑަކީ އެކި ދާއިރާތަކުން ދުނިޔޭގެ ފެންވަރުގައި މަސައްކަތްކޮށް ބައިނަލްއަގުވާމީ މުޖުތަމައު ކުރިއެރުވުމަށް މަސައްކަތް ކުރާ ފަރާތްތަކަށް ދޭ އެވޯޑެކެވެ.  އެ އެވޯޑް ހޮވުމުގެ މަރުހަލާ ބިނާވެފައިވަނީ ގްލޯބަލް ސިޓިޒަން އެވޯޑް ކޮމިޓީގެ އަޣުލަބިއްޔަތުން ނިންމާ ނިންމުމަށެވެ.

މި އަހަރުގެ އެވޯޑު ނަޝީދަށް އަރުވާފައިވަނީ ސިންގަޕޫރުގައި މިހާރު ކުރިއަށްދާ 18 ވަނަ ގްލޯބަލް ސިޓިޒެންޝިޕް ކޮންފަރެންސްގަ އެވެ.

ހެންލީ އެންޑް ޕާޓްނާސް ފާމްގެ ޗެއާމަން ޑރ. ކްރިސްޓިއަން އެޗް ކައެލިންގެ އިސްނެންގެވުމުގެ މަތިން އެ އެވޯޑް ދޭން ފެށީ 2014 ވަނަ އަހަރުން ފެށިގެންނެވެ. އެ ފަހުން މި އެވޯޑް ދީފައިވަނީ ހަ ބޭފުޅަކަށެވެ. ނަޝީދަކީ މުޅި ދުނިޔެއިންވެސް އެ އެވޯޑް ލިބިވަޑައިގެންނެވި ހަތްވަނަ ބޭފުޅާ އެވެ.