ކައުންސިލްތަކުގެ ބާރުތައް ހަނިވާ ގޮތަށް ފާސްކުރި އާބަން ޑިވެލޮޕްމަންޓް ބިލު ތަސްދީގުކޮށްފި

ރާއްޖޭގެ އެކި ސަރަހައްދުތަކުގައި އާބަން ސެންޓަރުތައް ކަނޑައެޅުމުގެ ބާރު ރައީސަށް ލިބޭ ގޮތަށް ރައްޔިތުންގެ މަޖިލީހުން ފާސްކުރި އާބަން ޑިވެލޮޕްމަންޓް ބިލް، ރައީސް ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

ސަރުކާރުގެ ފަރާތުން ވިލިނގިލީ ދާއިރާގެ މެންބަރު އާޒިމް އަބްދުލް އަޒީޒު މަޖިލީހަށް ހުށަހެޅި އެ ބިލު ފާސްކުރީ މިދިޔަ ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައެވެ.

އެ ބިލުގެ މައިގަނޑު ބޭނުމަކީ، ރާއްޖޭގައި އާބަން ސަރަހައްދުތައް ކަނޑައެޅުމާއި އެފަދަ ސަރަހައްދުތައް ތަރައްގީކުރުމާގުޅޭ ކަންކަން ހަރުދަނާ ގާނޫނީ އޮނިގަނޑެއްގެ ދަށުން އިންތިޒާމުކުރުމަށްޓަކައި، އާބަން ސަރަހައްދުތަކާއި އެފަދަ ސަރަހައްދުތަކުގެ ޒޯންތަކާއި ގިންތިތަކާއި ބިމުގެ ބޭނުން ކަނޑައެޅުމާއި އެފަދަ ސަރަހައްދުތައް ތަރައްގީކޮށް ހިންގުމުގެ އަސާސީ މިންގަނޑުތަކާއި އާބަން ސަރަހައްދުތަކުގައި ހިންގާ ތަރައްގީގެ މަޝްރޫއުތައް މޮނިޓާކޮށް ފިޔަވަޅު އެޅުމާބެހޭ އުސޫލުތައް ބަޔާންކުރުމެވެ.

އާބަން ޑިވެލޮޕްމަންޓް ބިލު ތަސްދީގު ކުރުމާއެކު، އާބަން އޮތޯރިޓީގެ ނަމުގައި ހައުސިން އެންޑް އާބަން ޑިވެލޮޕްމަންޓް މިނިސްޓްރީގެ ދަށުން އާ އޮތޯރިޓީއެއް އުފައްދާނެ އެވެ. އެ އޮތޯރިޓީއަކީ ހުޅުމާލެ ތަރައްގީ ކުރާ އެޗްޑީސީ ފަދައިން ބޮޑެތި ބާރުތަކެއް ލިބޭ ގޮތަށް އުފައްދާ ތަނެކެވެ.

އެގޮތުން އާބަން ސަރަހައްދެއްގެ ގޮތުގައި ކަނޑައަޅާ ވަކި ސަރަހައްދަކީ ލޯކަލް ކައުންސިލެއްގެ އިހުތިސާސްގެ ތެރޭގައި ހިމެނޭ ސަރަހައްދެއް ކަމަށްވީ ނަމަވެސް، އެ ސަރަހައްދެއް ޕްލޭން ކުރުމާއި ތަރައްގީ ކުރުމުގެ މަސައްކަތް ކުރާނީ އާބަން އޮތޯރިޓީންނެވެ. އަދި އެ ސަރަހައްދެއް ޕްލޭންކޮށް ތަރައްގީ ކުރުމާ ގުޅޭ ގޮތުން ކުރަންޖެހޭ ކަންކަން ވިލަރެސްކޮށް، މަސައްކަތް ކުރިއަށް ގެންދަން ޖެހޭނީ ކައުންސިލާއި އޮތޯރިޓީއާ ދެމެދު ލިޔުމުން ވެވޭ އެއްބަސްވުމެއްގެ ދަށުން ކަމަށް އެ ބިލުގައި ބުނެފައިވެ އެވެ.

އާބަން ޑިވެލޮޕްމަންޓް ގާނޫނާއެކު ކައުންސިލްތަކަށް ދެން މަތިކޮށްފައި އޮންނަނީ އާބަން ސަރަހައްދެއްގައި ދޭންޖެހޭ ރަށްވެހިކަމުގެ ހިދުމަތްތައް ދިނުމާއި މުނިސިޕަލް ކަންކަން ކުރުމުގެ ބާރެވެ.

އާބަން ޑިވެލޮޕްމެންޓް ބިލާ މެދު ކޮމިޓީ މަރުހަލާގައި ބިލާމެދު ސަރުކާރުގެ ފަރާތުން ލޯކަލް ގަވަމެންޓް މިނިސްޓްރީންވެސް ކަންބޮޑުވުން ފާޅުކުރި އެވެ. އެ މިނިސްޓްރީން ބުނި ގޮތުގައި އެ ބިލުން ކައުންސިލްތަކުގެ ބާރު ކުޑަވެގެންދާނެ އެވެ. އިދިކޮޅު އެމްޑީޕީން ބުނެފައި ވަނީ މި ބިލުން ލާމަރުކަޒީ ނިޒާމުގެ ހަމަތަކަށް ގުޑުން އަރައި، ކައުންސިލްތަކުގެ މަސައްކަތް ހަނިވެގެންދާނެ ކަމަށެވެ.

ބިލް ދިރާސާކުރަން އެކުލަވާލާފައިވާ ހާއްސަ ކޮމިޓީގައި ބައެއް މެންބަރުންވެސް ވަނީ އެ ބިލާއެކު، ލާމަރުކަޒީ ނިޒާމުގައި ތަޅު އެޅުވި، ކައުންސިލްތަކަށް ފުޅާކޮށް ދީފައިވާ ބާރުތައް ގެއްލި، ލާމަރުކަޒީ ގާނޫނަކީ އެހެން ގާނޫނެއްގެ ބެލެނިވެރިކަމުގެ ދަށުން ހިންގާ އާދައިގެ ގާނޫނަކަށް ވާނެކަމުގެ ނުތަނަވަސްކަން ފާޅުކޮށްފަ އެވެ.