އަލިފާނުގެ ހާދިސާއާ ގުޅިގެން ތިން މިނިސްޓްރީއެއްގެ ހިދުމަތްތައް ހުއްޓިއްޖެ

އަލިފާނުގެ ހާދިސާއާ ގުޅިގެން ހައުސިން މިނިސްޓްރީއާއި އިންފްރާސްޓަރަކްޗާ މިނިސްޓްރީގެ އިތުރުން އެންވާރަމެންޓް މިނިސްޓްރީއަށް ވެސް ބޮޑެތި ގެއްލުންތަކެއް ލިބި, އެ ތިން މިނިސްޓްރީގެ މަސައްކަތްތައް ވަގުތީ ގޮތުން މެދުކެނޑިއްޖެ އެވެ.

މިއަދު ހިނގި މި  އަލިފާނުގެ ހާދިސާގައި ހައުސިން މިނިސްޓްރީއާއި އިންފްރާސްޓްރަކްޗަރު މިނިސްޓްރީ ހިންގާ އިމާރާތް ވަނީ ބޭނުންނުކުރެވޭ ވަރަށް އަނދާ ހުލިވެފައެވެ. ހައުސިން މިނިސްޓްރީގެ އިމާރާތުގެ ތެރޭގައި މާލޭ ސިޓީ ކައުންސިލްގެ އިދާރާއެއް ވެސް ދިޔައީ ހިންގަމުންނެވެ.

އެ އަލިފާނުގެ ހާދިސާގެ ސަބަބުން އެންވަޔަރުމެންޓް މިނިސްޓްރީއަށް ވެސް ވަނީ ގެއްލުންވެފަ އެވެ.

ހައުސިން މިނިސްޓްރީން ނެރުނު ބަޔާނެއްގައި ބުނީ މި ހާދިސާގައި އެ މިނިސްޓްރީގެ މުވައްޒަފަކަށް އަނިޔާއެއް ވެފައި ނުވާ ކަމަށެވެ. މިނިސްޓްރީން ބުނީ ގެދޮރުވެރިޔާ ސްކީމާ ގުޅޭ ލިޔެކިޔުމާއި މައުލޫމާތަކީ އެ މިނިސްޓްރީގެ ކްލައުޑް ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމަށެވެ.

އެހެންކަމުން މި ހާދިސާގެ ސަބަބުން އެ މައުލޫމާތުތަކަށް އެއްވެސް އަސަރެއް ނުކުރާނެ ކަމަށް ހައުސިން މިނިސްޓްރީން ބުންޏެވެ. ނަމަވެސް މިނިސްޓްރީގެ މަސައްކަތްތައް ވަނީ ހުއްޓުމަކަށް އައިސްފައިވާ ކަމަށެވެ.

އެންވަޔަރުމެންޓް މިނިސްޓްރީއާއި ކޮންސްޓްރަކްޝަން މިނިސްޓްރީން ނެރުނު ނޫސްބަޔާނެއްގައި ބުނީ އަލިފާނުގެ އަސަރު ވަރަށް ބޮޑަށް ކޮށްފައި ވާތީ މި ވަގުތަށް މަސައްކަތްތައް ހުއްޓިފައިވާ ކަމަށެވެ.

އަލިފާންގަނޑު ވަރަށް ބޮޑަށް މިހާރު ވަނީ ކޮންޓްރޯލް ކޮށްފައެވެ. ނަމަވެސް އެ ސަރަހައްދުގައި ދުމުގެ އަސަރު ވަރަށް ބޮޑެވެ.