ސްޓެލްކޯއިން ހަ މަސް ތެރޭގައި 50،000 އަށްވުރެ ގިނަ ގަސް އިންދައިފި

ސްޓެލްކޯ އިން ހިދުމަތް ދޭ ރަށްރަށުގައި 50،000 އަށްވުރެ ގިނަ ގަސް އިންދައިފި އެވެ.

ސްޓެލްކޯ އިން ވަނީ ސަރުކާރުގެ ”ފަސް އަހަރުން ފަސް މިލިއަން ގަސް“ ޕްރޮގްރާމްގައި ބައިވެރިވުމުގެ ގޮތުން، މިދިޔަ ޖޫން މަހުގެ ފަސްވަނަ ދުވަހު، ފަސް އަހަރުން ފަސް ލައްކަ ގަސް އިންދުމަށް ހާއްސަ ހަރަކާތެއް ފަށައިފަ އެވެ.

ސްޓެލްކޯ އިން ބުނީ، މި މަހުގެ 21 ވަނަ ދުވަހުގެ ނިޔަލަށް އެ ކުންފުނިން ހިދުމަތް ދޭ ރަށްރަށުގައި ޖުމުލަ 52،334 ގަސް އިންދާފައިވާ ކަމަށެވެ.

ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ މީގެ ކުރިން ވިދާޅުވެފައިވާ ގޮތުން، އެ ކުންފުނީގެ އަމާޒަކީ ކޮންމެ މަހަކުވެސް 9،200 ގަސް އިންދުމެވެ.