20 ރަށެއްގެ ފެނާއި ނަރުދަމާގެ ހުރިހާ މަސައްކަތެއް އެމްޑަބްލިޔުއެސްސީން ނިންމާލައިފި

ޕީއެސްއައިޕީގެ ދަށުން އެމްޑަބްލިއުއެސްސީން ކުރިޔަށް ގެންދިޔަ 20 ރަށެއްގެ ފެނާއި ނަރުދަމާގެ ހުރިހާ މަޝްރޫއެއް މިއަހަރުގެ ނިންމައިލައިފައިވާ ކަމަށް އެ ކުންފުނިން ބުނެފި އެވެ.

އެމްޑަބްލިޔުއެސްސީން އިއްޔެ ބުނީ އޭގެ ތެރެއިގައި ހިމެނެނީ ފަސް ރަށެއްގެ ފެނުގެ ނިޒާމު ގާއިމް ކުރުމާއި 15 ރަށެއްގެ ފެނާއި ނަރުދަމާގެ ނިޒާމު ގާއިމް ކުރުން ކަމަށެވެ.

ފެނުގެ ނިޒާމު ގާއިމްކޮށްފައިވާ ރަށްތަކަކީ، ހއ. މުރައިދޫ، ށ. ފީވައް، ނ. ހެނބަދޫ، ރ. އިންނަމާދޫ، އއ. މަތިވެރި ކަމަށް އެމްޑަބްލިޔުއެސްސީން ބުންޏެވެ. އަދި ފެނާއި ނަރުދަމާގެ ނިޒާމު ގާއިމްކޮށްފައިވާ ރަށްތަކަކީ، ހއ. ވަށަފަރު، ހއ. މާރަންދޫ، ހއ، ތަކަންދޫ، ހދ. ހިރިމަރަދޫ، ހދ، ކުމުންދޫ، ށ. ގޮއިދޫ، ނ. މާފަރު، ނ. ފޮއްދޫ، ރ. ފައިނު، ބ. ކަމަދޫ، ބ. މާޅޮސް، ޅ. އޮޅުވެލިފުށި، އދ، ކުނބުރުދޫ، އއ. ހިމަންދޫގެ އިތުރުން އއ. ފެރިދު ކަމަށް އެމްޑަބްލިޔުއެސްސީން ބުންޏެވެ.

އެމްޑަބްލިއުއެސްސީން ބުނީ އެންމެ ފަހު ރަށް ކަމުގައިވާ ހއ. ވަށަފަރުގެ މަސައްކަތް ނިންމައި، ކޮމިޝަން ކޮށްފައިވަނީ އިއްޔެ ކަމަށެވެ.

އެމްޑަބްލިޔުއެސްސީން ކުރިއަށް ގެންދިޔަ އެ މަޝްރޫއުތަކުގެ ދަށުން، ރަށްތަކުގައި ފެން ޕްލާންޓު ބަހައްޓައި، ފެސިލިޓީ ބިލްޑިން އިމާރާތްކޮށް، ފެން އުފެއްދުމަށް ބޭނުންވާ ފެން ޕްލާންޓާއި އެހެނިހެން ވަސީލަތްތައް ގާއިމްކޮށް، ފެން ރައްކާ ކުރުމަށް ތާނގީތައް ބަހައްޓައި، ފެނާއި ނަރުދަމާ ހޮޅީގެ މައި ނެޓްވޯކު އަޅައި، ގޭގެއަށް ފެނާއި ނަރުދަމާގެ ކަނެކްޝަން ވެސް ވަނީ ގުޅައިދީފައިވާ ކަމަށެވެ،

އަދި ނަރުދަމާގެ ޕަމްޕިން ސްޓޭޝަންތައް ގާއިމްކޮށް، ސީ އައުޓް ފްލޯއާ ރިޖެކްޓް ލައިން ވެސް ގުޅައިދީ ފެނާއި ނަރުދަމާގެ ނިޒާމު ބެލެހެއްޓުމަށް ބޭނުންވާ ސާމާނާއި ފެން ތަހުލީލު ކުރުމަށް ބޭނުންވާ ސާމާނު މި މަޝްރޫއުތަކުގެ ދަށުން ފޯރުކޮށްދޭނެ ކަމަށް އެމްޑަބްލިޔުއެސްސީން ބުންޏެވެ.

މި 20 ރަށުގެ ފެނާއި ނަރުދަމާގެ ނިޒާމު ގާއިމްކުރުމުގެ މަޝްރޫއުތަކަކީ، މިދިޔަ ސަރުކާރުގައި މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗާއިން ހަވާލުކޮށްގެން ސަރުކާރުގެ ޚަރަދުގައި ކުރިޔަށް ގެންދިޔަ މަޝްރޫއުތަކެކެވެ. މި މަޝްރޫއުތަކުގެ ޖުމްލަ އަގަކީ 1.34 ބިލިއަން ރުފިޔާއެވެ.

އެމްޑަބްލިއުއެސްސީން ބުނީ، ޕީއެސްއައިޕީގެ ދަށުން ކުރިޔަށް ގެންދިޔަ ހުރިހާ ރަށެއްގެ މަސައްކަތް މި އަހަރުގެ ނިޔަލަށް ނިންމައިލުމުގެ އަމާޒަށް ވާސިލްވެވުނީ، ވަރަށް ގިނަ ބައެއްގެ ބުރަ މަސައްކަތުން ކަމަށެވެ. އެ ކަން ފާހަގަކޮށް އެ ކުންފުނީގެ މެނޭޖިން ޑިރެކްޓަރު، އަބްދުލްމަތީނު މުހައްމަދުވަނީ އެ ހުރިހާ ފަރާތްތަކަށް ޝުކުރު އަދާކުރައްވަފައިފައެވެ.