މޫސުމީ ބަދަލުތަކަށް ތައްޔާރުނުވެއްޖެނަަ އިއްޔެ ފެނުނު މަންޒަރު އަލުން ފެންނާނެ: ނަޝީދު

މޫސުމަށް އަންނަ ބަދަލުތަކަށް ތައްޔާރުނުވެއްޖެނަމަ އިއްޔެއިން މާލެއިން ފެނުނު މަންޒަރު އަލުން ތަކުރާރުވާނެ ކަމަށް ރައްޔިތުންގެ މަޖިލީހުގެ ކުރީގެ ރައީސް، ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

މާލެއަށް އިއްޔެކުރި ބޯކޮށް ވާރޭވެހި މުޅި މާލެ ވަނީ ފެނު އަޑިއަށް ގޮސްފަ އެވެ. މާލޭގައި ބޮޑުވި ފެންގަނޑު ހިންދައި ނިންމާލުމަށް އެމްއެންޑީއެފުން ވަނީ 21 ގަޑިއިރު މެދުކެނޑުމެއްނެތި މަސައްކަތްކޮށްފަ އެވެ. މެޓް އޮފީހުން ބުނެފައިވަނީ އިއްޔެ މާލެއަށް ވަނީ ރިކޯޑް އަދަދަކަށް ވާރޭ ވެހިފައި ކަމަށެވެ. އެގޮތުން މާލެއަށް ގަޑިއިރަކު 60 މިލިމީޓަރުގެ ވާރޭ ވެހުނު ކަމަށް މެޓުން ބުނެފައިވެ އެވެ.

ނަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ދުނިޔެ ހޫނުވަމުން ދާނަމަ އެފަދަ މަންޒަރުތައް ތަކުރާރުވާނެ ކަމަށެވެ. ނަޝީދު ވިދާޅުވީ ރާއްޖޭގެ ބައިވެރިވުމެއް ނެތި މޫސުމަށް އަންނަ ނޭދެވޭ ބަދަލުތަކުގެ އަގު ރާއްޖެއިން އަދާކުރަން ޖެހިފައިވާ ކަމަށެވެ.

ނަޝީދު ވަނީ މާލޭގެ މާފަންނުގައި އިއްޔެ ފެންބޮޑުވެ، އެ ސަރަހައްދުގައި ޕާކުކޮށްފައި ހުރި ސައިކަލުތައް ވެސް ވެއްޓިފައި ހުރި މަންޒަރު ހިއްސާކުރައްވައިފައެވެ. އެ ވީޑިއޯއިން ސައިކަލުތައް ވެއްޓި، އެއްކޮށްހެން ފެނުގެ އަޑީގައިވާ މަންޒަރު ފެނެއެވެ.

އިއްޔެ މުޅި މާލޭގައި ވަރަށް ބޮޑަށް ފެންބޮޑުވިއިރު އެކަމުގެ ސަބަބުން ޖުމުލަ 36 ގެއަކުން 226 މީހަކަށް ވަގުތީ ބޯހިޔާވަހިކަމާއި ކާނާގެ އެހީތެރިކަން ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ވަނީ ބުނެފައެވެ.