ރިޔާސީ ބަޔާން އިއްވުން އަންނަ މަހު 6ގައި

މި އަހަރަށް ރައްޔިތުންގެ މަޖިލީހުގެ އާ ދައުރުގެ މަސައްކަތް ފެށުމުގެ ގޮތުން ރައީސް ޑރ. މުހައްމަދު މުއިއްޒު ރިޔާސީ ބަޔާން އިއްވަން ބާއްވާ ޖަލްސާ އަންނަ މަހު 6 އަށް ތާވަލް ކުރަން ނިންމައިފި އެވެ.

ރައްޔިތުންގެ މަޖިލީހުން އަދި ރަސްމީކޮށް އެކަން ކަށަވަރުކޮށްދީފައިނުވެ އެވެ. ނަމަވެސް ޕީއެންސީ ޕީޖީ ގްރޫޕުގެ ބައެއް މެންބަރުން ވަނީ އެކަން މި ނޫހަށް ކަށަވަރުކޮށްދެއްވައިފަ އެވެ.

ގާނޫނުއަސާސީގެ 84 ވަނަ މާއްދާގައިވާ ގޮތުން ކޮންމެ އަހަރަކު ވެސް މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ގައުމުގެ ހާލަތު ބަޔާން ކޮށްދީ އަދި ގައުމުގެ ހާލަތު އިތުރަށް ރަނގަޅު ކުރުމަށްޓަކައި ކުރަން ޖެހޭ ކަމަށް ރައިސުލްޖުމްހޫރިއްޔާ އަށް ފެނިވަޑައިގަންނަވާ ކަންތަކުގެ މައްޗަށް އެކުލެވޭ ރިޔާސީ ބަޔާނެއް މަޖިލީހުގައި އިއްވަން ވާނެ އެވެ.

އަންނަ މަހު މަޖިލިސް މިއަހަރަށް ހުޅުވާއިރު، އޭގެ ކުރިން ޗުއްޓީ ތެރޭގައި ދައުރުން ބޭރުން ދެ ޖަލްސާއެއް ބޭއްވުމަށް ވަނީ ހަމަ ޖެހިފަ އެވެ. މި މަހު16 އަދި 20ގައި ބާއްވާ އެ ދެ ޖަލްސާ ބާއްވަނީ، އިލެކްޝަން ކޮމިޝަން (އީސީ)ގެ ހުސްވެފައިވާ ދެ މެންބަރުންގެ މަގާމަށް އަދި ބްރޯޑްކާސްޓިން ކޮމިޝަން (ބްރޯޑްކޮމް)ގެ ހުސްވެފައިވާ ދެ ގޮނޑިއަށް މެންބަރުން ރުހުން ދިނުމާ ގުޅޭ ގޮތުން ގޮތެއް ނިންމުމަށެވެ.