ދިވެހިންގެ ހެޔޮކަން ފެނި ރާއްޖެއަށް ޗުއްޓީއަށް އައި ކްރިސްޓިއަން ފާދިރީއެއްގެ ދަރިއަކު އިސްލާމްވެއްޖެ

ރާއްޖެއަށް ޗުއްޓީ ހޭދަކުރަން އައި ޓޫރިސްޓަކު އިސްލާމްވެއްޖެ އެވެ.

އެންގޭޖްމަންޓް ފާހަގަކުރަން ލޯބިވެރިޔާއާއެކު ރާއްޖެ އައި އިޓަލީގެ އެ ފަތުރުވެރިޔާ ރެޑިޓްގައި ކޮށްފައިވާ ޕޯސްޓެއްގައި ބުނީ، އެ މީހުން ތިބީ ރަށެއްގެ ގެސްޓްހައުސްއެއްގައި ކަމަށެވެ. އަދި މޫސުން ގޯސް ދުވަހެއްގައި ފަރުމައްޗަށް ސްނޯކްލިންއަށް ގޮސް އުޅެނިކޮށް ލޯބިވެރިޔާގެ ފޯނު ގެއްލުނު ކަމަށާއި އެ ހިސާބުން ފޯނު އެއްކޮށް ގެއްލުނު ކަމަށް ނިންމި ކަމަށެވެ. ނަމަވެސް ފޯނު އޮތީ ފެން ނުވަންނަ ކަވަރަކަށް ލާފައި ކަމަށް ބުންޏެވެ.

އެ މީހާ ބުނި ގޮތުގައި އެ ފޯނަކީ އެ މީހުންގެ ވަރަށް ގިނަ ހަނދާންތަކެއް ހުރި ފޯނަކަށްވުމާއި ބެކަޕްއެއްވެސް ނުނަގާ ހުރުމުން ލޯބިވެރިޔާ އެކަމާ ވަރަށް ދެރަވި ކަމަށެވެ.

”ފޯނު ގެއްލުނު ވާހަކަ ލޯބިވެރިޔާ ބުނީ އެންމެ ދިވެއްސެއްގެ ގާތުގައި. އެއާއެކު އެ ދިވެހި މީހާ އޭނާގެ ރަހުމަތްތެރިންނާ އެކު ފޯނު ހޯދަން އެތައް ގަޑިއިރެއް ވަންދެން ސްނޯކްލިންގައި އުޅުނު. އަހަރެމެން ބުނިން ދެން އެ ނުފެންނާނޭ. އެކަމާ ނޫޅުމަށް. އެކަމަކު އެވަރުން ވެސް އެ މީހުން ދުލެއް ނުކުރި،“ ފިރިހެން މީހާގެ ޕޯސްޓުގައި ބުނެފައިވެ އެވެ.

އޭނާ ބުނީ، ދިވެހިން ކުރި މަސައްކަތުން އޭނާގެ ލޯބިވެރިޔާގެ ފޯނު ހޯދި ކަމަށެވެ. އަދި ދިވެހިން އޯގާތެރީ މުސްލިމުންނަށް ވީމަތޯ ސުވާލުކޮށް އިސްލާމް ވާން ބޭނުން ކަމަށް އެ ޕޯސްޓުގައި ބުނެފައިވެ އެވެ. އަދި ’އިސްލާމްވުމަށް އޭނާ ދާންވީ ތަނެއް‘ ބުނެދިނުމަށް އެދުނެވެ.

އޭގެ ފަހުން ކޮށްފައިވާ އެހެން ޕޯސްޓެއްގައި ބުނެފައިވަނީ ދިވެހި އިލްމުވެރިޔަކާ ބައްދަލުވެ، އިސްލާމް ދީނާ ގުޅޭ މައުލޫމާތު ހޯދާފައިވާ ކަމަށެވެ. ދީނުގެ އެންމެ އާންމު ކަންކަމާއި ނަމާދު ކުރާނެ ގޮތާއި ރޯދަ ހިފާނެ ގޮތުގެ ވީޑިއޯ ލިންކުތަކާއި ޒަކާތް ދޭނެ ގޮތްވެސް އެ އިލްމުވެރިޔާ އޭނާއާ ހިއްސާކޮށްފައިވާ ކަމަށް ބުންޏެވެ.

”މިހާރު އަހަންނަކީ މުސްލިމެއް. އަހަރެން ޝަހާދަތް ކިޔައިފިން،“ މީގެ ކުރިން ހަ ފަހަރު ރާއްޖެ އައިސްފައިވާ އެ ފަތުރުވެރިޔާ ލިޔުނެވެ.

”ލޯބިވެރިޔާ މުސްލިމަކަށް ނުވޭ. އެއީ އަހަންނަށް މައްސަލައެއް ނޫން. އަހަރެން މުސްލިމަކަށްވީ މަޖުބޫރަކުން ނޫން. އޭނާވެސް މުސްލިމަކަށްވާކަށް އަހަރެން މަޖުބޫރެއް ނުކުރާނަން،“

އޭނާ ބުނި ގޮތުގައި އޭނާ އިސްލާމްވި ވާހަކަ ރެޑިޓްގައި ހިއްސާކުރީ އޭނާގެ އާއިލާއަކީ ކްރިސްޓިއަން އާއިލާއަކަށްވެފައި، ބައްޕައަކީ އޭނާ އުޅޭ އަވަށުގެ ފައްޅިއެއްގެ ފާދިރީއެއް ކަމަށެވެ. އަދި އެންމެ ފަސޭހަ ކަންތައް މިވީ ކަމަށާއި އިޓަލީއަށް ގޮސް ބައްޕަ ގާތު އިސްލާމްވި ވާހަކަ ބުނުމަކީ އެންމެ އުދަނގޫވާނެ ކަންތައް ކަމަށްވެސް އޭނާ ބުނެފައިވެ އެވެ.