ކޮފީފުޅި ވަގަށް ނެގި މީހަކު ހަތް ދުވަހަށް، ދަވާދު ދަޅެއް ވަގަށް ނެގި މީހަކު ތިން ދުވަހަށް ބަންދަށް!

މާލޭގެ ފިހާރަ އަކުން 10 ކޮފީ ފުޅި ވަގަށް ނެގި މީހެއްގެ ބަންދަށް ކުރިމިނަލް ކޯޓުން ހަތް ދުވަސް ޖަހައިފި އެވެ.

ކޮފީ ފުޅިތަކެއް ވަގަށް ނެގި މައްސަލައިގައި ހައްޔަރުކޮށްފައިވަނީ ގދ. ގައްދޫ/ ކުއްޅަވަށްގެ، އިބްރާހިމް ޝާކިރު (43އ) އެވެ.

ފުލުހުން އޭނާ ކުރިމިނަލް ކޯޓަށް އިއްޔެ ހާޒިރުކުރުމުން ކޯޓުން ވަނީ މުޖުތަމައުގެ ސަލާމަތާއި ރައްކާތެރިކަމަށްޓަކައި އޭނާ  ހަތް ދުވަހަށް ބަންދުކުރަން ކޯޓު އަމުރުކުރިއެވެ،

އަމުރުގައި ވާގޮތުން އޭނާ އަކީ މިހާތަނަށް ހައްޔަރާއި ބަންދުގެ 40 ރެކޯޑް އޮތް މީހެކެވެ.

މީގެ އިތުރުން ކުރިމިނަލް ކޯޓުން އިއްޔެ ވަނީ ދަވާދު ދަޅެއް ވަގަށް ނެގި މީހަކު ތިން ދުވަހަށް ބަންދުކުރަން އަމުރުކޮށްފައެވެ.

ދަވާދު ދަޅެއް ވަގަށް ނެގި މައްސަލައިގައި ހައްޔަރުކޮށްފައިވަނީ، ތ. މަޑިފުށި، ހެޕީ ސައިޑް، މުހައްމަދު ޝިޔާޒް (42އ) އެވެ.