މަޑުއްވަރީގައި ވަޅިން ހަމަލާދިން މައްސަލާގައި މީހަކު ހައްޔަރުކޮށްފި

ރ. މަޑުއްވަރީގައި މީހަކަށް ވަޅިން ހަމަލާދިން މައްސަލައެއްގައި މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.

އެނގިފައިވާ ގޮތުގައި މާރާމާރީ ހިނގާފައިވަނީ ދެބެންގެ ދެމެދުގައެވެ. އެގޮތުން ކޮއްކޮއަކު އޭނާގެ ބޭބެއަށް ހަމަލާދީފައިވަނީ ވަޅިއެއް ބޭނުންކޮށްގެންނެވެ.

ފުލުހުން މިއަދު ބުނީ، މަޑުއްވަރީގައި ދެ މީހެއްގެ ދެމެދުގައި ހިނގި މާރާމާރީގެ މައްސަލަ ފުލުހުންނަށް ރިޕޯޓް ކޮށްފައިވަނީ ރޭ 11:28 އެހާކަންހާއިރު ކަމަށެވެ.

އެ މާރާމާރީގައި އަނިޔާވި މީހާއަށް މަޑުއްވަރީ ހެލްތު ސެންޓަރުގައި ފަރުވާދިން ކަމަށް ފުލުހުން ބުންޏެވެ. ލިބުނީ ކިހާވަރެއްގެ އަނިޔާއެއް ކަމެއް ނޭނގޭ އެވެ.

ފުލުހުން ބުނީ މާރާމާރީއާ ގުޅިގެން 35 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށެވެ.