މަހާޒްއާއި އަޒްމިރަލްދާ ފަނޑިޔާރުކަމުން ވަކިކުރަން ނިންމައިފ

ސަސްޕެންޑު ކޮށްފައިވާ ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު މަހާޒް އަލީ މަގާމުން ވަކިކުރަން ރައްޔިތުންގެ މަޖިލީހަށް ހުށަހަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން ދެންމެ ނިންމައިފި އެވެ.

ފަނޑިޔާރު އަޒްމިރާލްދާ އާއި މަހާޒް ވަކި ކުރަން ނިންމުމުން ދެން އެ މައްސަލަ ފޮނުވާނީ ރައްޔިތުންގެ މަޖިލީހަށެވެ. ފަނޑިޔާރުން މަގާމުން ވަކިވާނީ މަޖިލީހުން އެކަން ފާސް ކުރުމުންނެވެ.

ސުޕްރީމް ކޯޓުގެ ތިން ފަނޑިޔާރުން ކަމަށްވާ ޑރ. އަޒްމިރަލްދާ ޒާހިރާއި، މަހާޒް އަލީ ޒާހިރު އަދި އެ ކޯޓުގެ ކުރީގެ ފަނޑިޔާރު ހުސްނުއްސުއޫދުގެ ސުލޫކީ މައްސަލައެއް ބަލާކަމަށް ބުނެ، އެ ތިން ފަނޑިޔާރުން ސަސްޕެންޑު ކުރީ ފެބްރުއަރީ މަހުގެ 26ވަނަ ދުވަހެވެ.

އެ ފަނޑިޔާރުންގެ ސުލޫކީ މައްސަލައެއް ބަލަން ޖޭއެސްސީން ނިންމީ މަޖިލިސް މެންބަރުން، އެ މެންބަރުން އިންތިޚާބުވި ޕާޓީން ވަކިވުމުންނާއި ވަކިކުރުމުން ވެސް ގޮނޑި ގެއްލޭ ގޮތަށް ގާނޫނުއަސާސީއަށް ގެނެސްފައިވާ އިސްލާހުގެ މައްސަލައެއް ބަލަމުން ދަނިކޮށެވެ.

ސަސްޕެންޝަންގައި ހުންނެވި ހުސްނުއްސުއޫދު ވަނީ މާޗު މަހުގެ ހަތަރުވަނަ ދުވަހު އިސްތިއުފާ ދެއްވައިފައެވެ.

މި މައްސަލައިގައި އަޒްމިރަލްދާއާ ގުޅޭގޮތުން ޖޭއެސްސީގެ ތަހުގީގު ކޮމިޓީން މިދިޔަ މަހުގެ 17ވަނަ ދުވަހު ތަހުގީގު ނިންމައި، ޖަވާބުދާރީވުމަށް ފަނޑިޔާރަށް ފުރުސަތު ދިނުމަށް ފޮނުވި ރިޕޯޓުގައި ވަނީ، އެ ކޮމިޝަނުން އަޒްމިރަލްދާގެ މައްޗަށް ތުހުމަތު ކުރަނީ އޭނާ، އެ ކޯޓުގެ އެހެން ފަނޑިޔާރަކާ ބައިވެރިވެގެން ކްރިމިނަލް ކޯޓުގެ ފަނޑިޔާރުންތަކަކަށް ގުޅައި ނުފޫޒު ފޯރުވިކަމަށް ބުނާ މައްސަލައެއް ކަމަށެވެ.

މި މައްސަލައިގައި ސުޕްރީމް ކޯޓުގެ ފަނޑިޔާރު މަހާޒް އަލީ ޒާހިރަށް ވެސް ޖޭއެސްސީން ތުހުމަތު ކުރެއެވެ.