ނޭދެވޭ ކަންކަމުން ކުޑަކުދިން ދުރުހެލިކޮށް ރީތި ނަމާނޫ ދައްކަންޖެހޭ: ރައީސް

ނޭދެވޭ ކަންކަމުން ކުޑަކުދިން ދުރުހެލިކޮށް ރީތި ނަމާނޫ ކުޑަކުދިންނަށް ދައްކަންޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ރައީސް އެގޮތަށް ވިދާޅުވީ މިއަދު ފާހަގަކުރާ ކުޑަކުދިންގެ ދުވަހާ ގުޅިގެން  ޚިތާބުގަ އެވެ.

އެ މަނިކުފާނު ވިދާޅުވީ ރާއްޖޭގެ ހަތަރުބައި ކުޅަ އެއްބަޔަކީ ކުޑަކުދިން ކަމަށްވާއިރު، އެކުދިން ތައްޔާރުވަމުން ދަނީ މުސްތަގުބަލުގައި ގައުމުގެ ކަންކަމާ ހަވާލުވާން ކަމަށެވެ.

”ހަރުދަނާ ޖީލެއްގެ ގޮތުގައި އެ ކުދިން ބޮޑެތިކޮށް، ދިވެހީންގެ ސިޔާދަތާއި، ކަރާމާތާއި، ތަމައްދުން ނަގަހައްޓަން އަރަފޯދޭ ބަޔެއްގެ ގޮތުގައި ތަރުބިއްޔަތު ކުރުމަކީ، އަޅުގަނޑުމެންގެ ކޮނޑުގައި އެޅިފައި އޮތް އެންމެ އިސް ގައުމީ ވާޖިބެވެ،“ އެ މަނިކުފާނު ވިދާޅުވި އެވެ.

ތުއްތު ކުއްޖާ ދުނިޔެއަށް އުފަންވަނީ ފިތުރަތުގެ ސާފުކަން މަތީގައި ކަން ފާހަގަކުރައްވައި، ރައީސް ވިދާޅުވީ އެ ކުއްޖާގެ އުޅުމާއި އަގީދާ ބައްޓަންވަނީ ބެލެނިވެރީން ދިން ތަރުބިއްޔަތެއްގެ މައްޗަށް ކަމަށެވެ.

މިގޮތުން، ކޮންމެ ދުވަހަކުވެސް ބޭނުންތެރި އާ ކަންކަން ދަސްކުރުމާއި، ފަރުޟު ފަސްނަމާދު ކުރުމާއި، ދީނަށް ހުރުމަތްތެރިކޮށް ހިތުމާއި، ދިވެހި އާދަކާދަތަކަށް އަހުލުވެރިވުމަށް އެ މަނިކުފާނު އެދިވަޑައިގެންނެވި އެވެ.