ހޮރުމޫޒު ކަނޑުއޮޅި ބަންދުކުރަން އީރާނުގެ މަޖިލީހުން ނިންމައިފި

ހޮރުމޫޒު ކަނޑުއޮޅި ބަންދުކުރަން އީރާނުގެ ގާނޫނު ހަދާ މަޖިލީހުން ނިންމާފައިވާ ކަމަށް އެ ގައުމުގެ ދައުލަތުގެ މީޑިއާ އިން ބުނެފި އެވެ.

އީރާނުގެ ސީނިއާ މަޖިލިސް މެންބަރެއް ކަމަށްވާ އިސްމާއިލް ކައުސަރީއާ ހަވާލާދީ ޕްރެސް ޓީވީގައި ބުނެފައިވަނީ އެމެރިކާ އިން އީރާނަށް ދިން ހަމަލާތަކާ ގުޅިގެންނާއި އެ ހަމަލާތަކާ ގުޅިގެން ބޭރުގެ ގައުމުތަކުން އެއްޗެކޭ ބުނެފައި ނުވާތީ ހޮރުމޫޒު ކަނޑުއޮޅި ބަންދުކުރަން ނިންމާފައިވާ ކަމަށެވެ.

އިސްމާއިލް ކައުސަރީއަކީ އީރާނުގެ ގާނޫނު ހަދާ މަޖިލީހުގެ ގައުމީ ސަލާމަތާއި ފޮރިން ޕޮލިސީ ކޮމިޓީގެވެސް މެންބަރެކެވެ.

ހޮރުމޫޒު ކަނޑުއޮޅި ބަންދުކުރަން އީރާނުގެ ގާނޫނުހަދާ މަޖިލީހުން ފާސްކުރި ނަމަވެސް އެކަމަށް ގޮތް ނިންމާނީ އީރާނުގެ ސުޕްރީމް ނެޝަނަލް ސެކިއުރިޓީ ކައުންސިލުންނެވެ.

ދުނިޔޭގައި އުފައްދާ ތެލާއި ނެޗުރަލް ގޭސްގެ 20 އިންސައްތަ ދަތުރުކުރަނީ ހޮރުމޫޒު ކަނޑުއޮޅިންނެވެ. އެއީ ގާތްގަނޑާކަށް ދުވާލެއްގެ މައްޗަށް 17 އާއި 18 މިލިއަން ފީފާގެ ތެލެވެ. އެ ކަނޑުއޮޅިން އެމެރިކާގެ އެތައް އުޅަނދެއްވެސް ދަތުރުކުރެ އެވެ.

ހޮރުމޫޒު ކަނޑުއޮޅި ބަންދުކުރުމުގެ ސަބަބުން ތެލުގެ އަގު 80 ޕަސެންޓް ބޮޑުވެގެންދާނެ ކަމަށް ބައެއް ފަރާތްތަކަށް ލަފާކުރެ އެވެ.