ޒަހަމްކޮށްލާފައި އޮތް އުމުރުން ދުވަސްވީ މީހަކަށް ފަރުވާ ދެނިކޮށް މަރުވެއްޖެ

ޒަހަމްކޮށްލާފައި އޮތް އުމުރުން ދުވަސްވީ މީހަކަށް ފަރުވާ ދެނިކޮށް މަރުވެއްޖެ އެވެ.

މަރުވެފައިވަނީ  އއ. މާޅޮސް، އޯކިޑުމާގޭ، އަބްދުއް ރަހްމާން އާދަމް، 65 އެވެ.

ފުލުހުން މިއަދު ބުނީ މާޅޮހު ގެއެއްގެ ތެރޭގައި ނިދާފައި އޮތް އެ މީހާ ރޭ ދަންވަރު ސިއްހީ މަރުކަޒަށް ގެންދިޔައީ ދީފައިވާ ބޮޑެތި ޒަހަމްތަކާ ގުޅިގެން ކަމަށް މައުލޫމާތު ލިބިފައިވާ ކަމަށެވެ. އޭނާ މަރުވީ ފަރުވާ ދެމުންދަނިކޮށް ފަތިހުގެ ވަގުތެއްގައި ކަމަށް ފުލުހުން ބުންޏެވެ.

”އއ. މާޅޮސް ގެއެއްގައި ނިދާފައި އޮތް މީހަކަށް ބޮޑެތި ޒަހަމްތަކެއް ދިނުމުގެ ސަބަބުން ސިއްހީ މަރުކަޒަށް ގެންދެވި ފަރުވާ ދެމުންދާ ކަމުގެ މައުލޫމާތު ރޭ ދަންވަރު 01:50 ގައި ފުލުހުންނަށް ލިބުނު. އެ މިހާއަށް ފަރުވާ ދެމުންދަނިކޮށް ފަތިހުގެ ވަގުތެއްގައި ވަނީ ނިޔާވެފައި،“ ފުލުހުން ބުންޏެވެ.

ފުލުހުން އިތުރަށް ބުނީ މައްސަލައިގެ ތަހުގީގަށް މާލެއިން ޓީމެއް އެ ރަށަށް ދަތުރުކުރަމުންދާ ކަމަށެވެ.