ހިތުގެ ހާއްސަ ޑޮކްޓަރަކު ހިތް ހުއްޓިގެން މަރުވެއްޖެ

އިންޑިއާގެ ޗެންނާއީގައި ހުންނަ ހޮސްޕިޓަލެއްގައި މަސައްކަތް ކުރަމުންދިޔަ ކާޑިއެކް ސާޖަންއަކު ހިތް ހުއްޓިގެން މަރުވެއްޖެ އެވެ.

ރިޕޯޓްތައް ބުނާ ގޮތުން ސަވީތާ މެޑިކަލް ހޮސްޕިޓަލްގައި މަސައްކަތް ކުރަމުންދިޔަ އުމުރުން 39 އަހަރުގެ ޑރ. ގްރަޑްލިން ރޯއީ މަރުވީ އިއްޔެ ހެނދުނު ވޯޑް ރައުންޑަށް ނުކުމެ އުޅެނިކޮށެވެ.

ހައިދަރުއާބާދުގައި ހުންނަ ނިއުރޮލޮޖިސްޓެއް ކަމަށްވާ ޑރ. ސުދީރު ކުމާރު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި ޑރ. ރޯއީގެ ފުރާނަ ސަލާމަތް ކުރަން ވަރަށް މަސައްކަތް ކުރި އެވެ. ނަމަވެސް ހިތުގެ ވާތުގައި އިންނަ މައި ނާރު އެއްކޮށް ބެދިފައި ހުރުމުގެ ސަބަބުން ޑރ. ރޯއީ ސަލާމަތް ނުކުރެވުނު ކަމަށް ވިދާޅުވެފައިވެ އެވެ.

ޑރ. ކުމާރު ވަނީ އުމުރުން 30 އާއި 40 އަހަރާ ދެމެދުގެ ޒުވާން ޑޮކްޓަރުން ހިތް ހުއްޓިގެން މަރުވާ މިންވަރު އިތުރުވާތީ ކަންބޮޑުވުން ފާޅުކުރައްވައިފަ އެވެ.