ދަތުރު ކުރަމުންދިޔަ ބަހެއްގައި ރޯވެ 20 މީހަކު ފިހިގެން މަރުވެއްޖެ

މުމްބާއީ: އިންޑިއާގެ ހުޅަނގުގައި އޮންނަ ރާޖަސްތާނުގައި ދަތުރުކުރަމުންދިޔަ ބަހެއްގައި އަލިފާން ރޯވެ 20 މީހުން މަރުވެއްޖެ އެވެ.

ރިޕޯޓްތައް ބުނާ ގޮތުން ޖައިސަލްމާރުން ޖޯދްޕޫރަށް ދަތުރު ކުރަމުންދިޔަ އެ ބަހުގައި 50 މީހުން ދަތުރު ކުރި އެވެ. އޭގެ ތެރެއިން 19 މީހުން ބަސް ތެރޭގައި ފިހިގެން މަރުވެފައިވާއިރު, އެކަކު މަރުވީ ޖޯދްޕޫރުގެ ހޮސްޕިޓަލަށް ގެންދިޔަ މަގުމަތީގައެވެ.

ރިޕޯޓްތައް ބުނާ ގޮތުން ބަހުން ސަލާމަތްވި މީހުންގެ ތެރެއިން ދެ ކުޑަކުދިން ހިމެނޭހެން 15 ޕަސެންޖަރެއްގެ ހަށިގަނޑު ވަރަށް ބޮޑަށް ފިހިގެން ދަނީ ފަރުވާ ދެމުންނެވެ. އޭގެ ތެރެއިން ބައެއް މީހުންގެ ހަށިގަނޑުގެ 70 ޕަސެންޓް ފިހިފައިވާ ކަމަށްވެސް ރިޕޯޓްތައް ބުނެ އެވެ.

ނަން ނުޖެހުމަށް ޝަރުތުކޮށް އެންޑީޓީވީއަށް މައުލޫމާތު ދިން ފުލުސް އޮފިސަރަކު ބުނި ގޮތުގައި, ބަހުގައި އަލިފާން ރޯވީ ޝޯޓް ސާކިޓެއްގެ ސަބަބުން ކަމަށް ބެލެވޭ ކަމަށެވެ. ނަމަވެސް އެކަން އަދި ކަށަވަރެއް ނޫނެވެ.

މި ހާދިސާއާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ ވަނީ މަރުވި މީހުންގެ އާއިލާތަކަށް 200,000 ރުޕީސް އަދި އަނިޔާވި މީހުންގެ އާއިލާތަކަށް 50,000 ރުޕީސް ދޭނެ ކަމަށް ބުނެފަ އެވެ.