ބޮޑު ދަރަންޏެއް ދައްކަން ޖެހުނަސް، ޓެކްސް ބޮޑުކުރަން ނުޖެހޭނެ ގޮތަށް ރާވާފައިވާނެ: ޒަމީރު 

އަންނަ އަހަރު ޓެކްސް ބޮޑުކުރަން ނުޖެހޭނެ ގޮތަށް ރާވާފައިވާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.

ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ އަންނަ އަހަރުގެ ބަޖެޓާ ގުޅޭ ބަހުސްގައި މެންބަރުން ފާހަގަކުރެއްވި ކަންތައްތަކަށް ޖަވާބުދެއްވަމުން، މަޖިލީހުގެ ޖަލްސާގައި މިއަދު ޒަމީރު ވިދާޅުވީ އަންނަ އަހަރަކީ ރާއްޖޭގެ ތާރީހުގައިވެސް އެންމެ އުނދަގޫ ދަރަންޏެއް ދައްކަންޖެހޭ އަހަރު ކަމަށްވީ ނަމަވެސް، އަންނަ އަހަރަށް ބަޖެޓް ހުށަހަޅާފައިވަނީ އެ ކަންކަމަށް ރިއާޔަތްކޮށް، ރައްޔިތުންނަށް ދޭންޖެހޭ ހިދުމަތްތަކަށް އެއްވެސް ހުރަހެއް ނާންނާނެ ގޮތަށް ކަމަށެވެ.

އަންނަ އަހަރު ޓެކްސް ބޮޑުނުކޮށް ބަޖެޓަށް އާމްދަނީ އިތުރުކުރުމަށް ތަފާތު އެކި ކަންކަން ކުރިއަށްގެންދިއުމަށް ސަރުކާރުން ނިންމާފައިވާ ކަމަށާއި އެގޮތުން އިގުތިސާދު ފުޅާކުރުމުގެ މަސައްކަތްތަކެއް ކުރިއަށްގެންދާނެ ކަމަށް ޒަމީރު ވިދާޅުވިއެވެ.

މިނިސްޓަރު ވިދާޅުވީ އެއާޕޯޓުތައް ހިމެނޭ ސަރަހައްދުތަކުގައި ޓޫރިޒަމް އެނދު އިތުރުވެ ގްރޯތު ރޭޓް މަައްޗަށް ދާނެ ކަމަށާއި ރީޖަނަލް އެއާޕޯޓުތަކަކީ ދައުލަތަށް ފައިދާވާނެ ތަންތަނަށް ހެދުމަށް މަސައްކަތް ކުރަމުންދާ ކަމަށެވެ.

އޭގެ އިތުރުން އިންޓަނޭޝަނަލް ފައިނޭންޝަލް ސެންޓަރެއްގެ މަސައްކަތުގެ އިތުރުން ދުނިޔޭގެ ބޮޑެތި އިތުރު އިންވެސްޓްމެންޓްތައް ގެނައުމުގެ މަސައްކަތް ވެސް ކުރަމުންދާ ކަމަށް ޒަމީރު ވިދާޅުވިއެވެ.