އީރާނަށް ދޭ ހަމަލާއާ ދެކޮޅަށް ރަޝިއާ އާއި ޗައިނާއިން ތެދުވެއްޖެ!

އެމެރިކާއާއި އިޒްރޭލުން އީރާނަށް ދެމުންދާ ހަމަލާތައް ކުށްވެރިކޮށް އެ ހަމަލާތަކާ ދެކޮޅަށް ރަޝިއާ އާއި ޗައިނާ އިން ތެދުވެއްޖެ އެވެ.

މިދިޔަ ހޮނިހިރު ދުވަހު އެމެރިކާ އާއި އިޒްރޭލުން އީރާނަށް ދޭން ފެށި ހަމަލާތައް މިހާރު ވަނީ މެދުއިރުމަތީގެ ހަނގުރާމައަކަށް ބަދަލުވެފަ އެވެ.

އެ ހަމަލާތަކާ ގުޅިގެން ޗައިނާގެ ފޮރިން މިނިސްޓްރީން ނެރުނު ބަޔާނެއްގައި ބުނީ, އެ ގައުމުގެ ފޮރިން މިނިސްޓަރު ވަންގް ޔީ, އިޒްރޭލުގެ ފޮރިން މިނިސްޓަރު ގިޑިއޯން ސާރްއަށް އަންގާރަ ދުވަހު ގުޅުއްވައި, އީރާނަށް އިޒްރޭލުން ހަމަލާ ދޭން ފެށީ އެމެރިކާ އާއި އީރާންއާ ދެމެދު ކުރިއަށްދިޔަ މަޝްވަރާތަކަށް ބޮޑެތި ކުރިއެރުންތަކެއް ލިބިފައިވަނިކޮށް ކަމަށެވެ.

”ހިތާމައަކީ, އަސްކަރީ ހަމަލާތަކުގެ ސަބަބުން އެ މަޝްވަރާތަކަށް ހުރަސްއެޅިފައިވާކަން. އިޒްރޭލާއި އެމެރިކާ އިން އީރާނަށް ދޭ އެއްވެސް އަސްކަރީ ހަމަލާއަކަށް ޗައިނާއިން ދެކޮޅު ހަދާނެ,“ އިޒްރޭލުގެ ފޮރިން މިނިސްޓަރަށް ފޯނުން ގުޅުއްވައި ވާންގް ވިދާޅުވި ކަމަށް ޗައިނާގެ ފޮރިން މިނިސްޓްރީން ބުންޏެވެ.

އެ ފޯން ކޯލްގައި ވާންގް ވަނީ މަސްލަހަތު އިތުރަށް ގޯސްވެ, ކޮންޓްރޯލުން ނެއްޓިގެންދިޔަ ނުދިނުމަށްޓަކައި, އަސްކަރީ އޮޕަރޭޝަންތައް ވަގުތުން ހުއްޓާލުމަށް އީރާނަށް ގޮވާލައިފަ އެވެ. އަދި ބާރުގެ ބޭނުންކޮށްގެން މައްސަލަތަކަށް ހަގީގީ ހައްލެއް ނުހޯދޭނެ ކަމަށްވެސް ވާންގް ވިދާޅުވި އެވެ.

ރަޝިއާގެ ހާރިޖީ ވަޒީރު ސަރްގޭ ލަވްރޯވް ވިދާޅުވި ގޮތުގައި އީރާނާ ދެކޮޅަށް އިޒްރޭލާއި އެމެރިކާ ކުރާ ހަނގުރާމައިގެ ސަބަބުން, އެ ގައުމުތަކުން ހުއްޓުވަން ބޭނުންވާ ކަމަށް ބުނާ ނިއުކްލިއާ ހަތިޔާރު އުފެއްދުމަށް އިތުރަށް މަގުފަހިވެގެންދާނެ ކަމަށެވެ.

”ފަހަކަށް އައިސް ހިނގާފައިވާ ކަންތައްތަކަށް ބަލާއިރު, އަރަބި ގައުމުތަކުންވެސް މިހާރު ނިއުކްލިއާ ހަތިޔާދު ހޯދުމުގެ ރޭހުގައި ބައިވެރިވެދާނެ. ނިއުކްލިއާ ހަތިޔާރު ފެތުރުމުގެ މައްސަލަ ކޮންޓްރޯލުން ނެއްޓިގެންދާން ފަށާނެ,“ ނޫސްވެރިންނާ ވާހަކަދައްކަވަމުން ލަވްރޯވް ވިދާޅުވި އެވެ.

އޭނާ އިތުރަށް ވިދާޅުވީ, އީރާނުން ނިއުކްލިއާ ހަތިޔާރު އުފައްދާކަމުގެ އެއްވެސް ހެއްކެއް ރަޝިއާއަށް އަދި ފެނިފައިނުވާ ކަމަށެވެ. އަދި މިހާރު ފަށާފައިވާ ހަނގުރާމައަށް ޑިޕްލޮމެޓިކް ހައްލެއް ހޯދުމަށް އެހީތެރިވުމަށް ރަޝިއާ އޮތީ ތައްޔާރަށް ކަމަށްވެސް ވިދާޅުވި އެވެ.