އަބްރާރް ގުރޫޕަށް ދޫކޮށްފައިވާ ހުއްދަ ވަގުތީ ގޮތުން ހިފަހައްޓައިފި

އަލްއަބްރާރު ހައްޖު އެންޑް އުމްރާ ކުންފުންޏަށް ދޫކޮށްފައިވާ ރާއްޖެއިން މީހުން އުމްރާއަށް ގެންދިއުމާބެހޭ ހުއްދަ ވަގުތީ ގޮތުން ހިފަހައްޓައިފި އެވެ.

އުމްރާއަށް ދިއުމަށް އަބްރާރް ގުރޫޕަށް ފައިސާ ދެއްކި 110 މީހަކު، ސައުދީ އަރަބިއާއަށް ފުރުމަށް އެންމެ ފަހުގެ ތައްޔާރީތައް ވަމުންދަނިކޮށް އެ ދަތުރު އެ ގުރޫޕުން ވަނީ ކެންސަލްކޮށްފަ އެވެ. އެ މައްސަލާގައި ބަޔަކު ވަނީ އެ ޖަމާއަތުގެ އޮފީސް ހުންނަ ސަރަހައްދަށް އެއްވެ ކަންބޮޑުވުން ވެސް ފާޅުކޮށްފަ އެވެ.

އެ މައްސަލައާ ގުޅިގެން އިސްލާމިކް މިނިސްޓްރީން މިއަދު ނެރުނު ނޫސްބަޔާނެއްގައި ބުނީ، އަބްރާރް ކުންފުނިން 3 މާރިޗް އިން 26 މާރިޗަށް ކުރުމަށް ހަމަޖައްސާފައިވާ އުމްރާ ދަތުރު އެންމެ ފަހު ވަގުތު ކެންސަލްކޮށްފައިވަނީ މަގުބޫލު އެއްވެސް ސަބަބެއް ނެތި އަދި ރާއްޖެއިން އުމްރާއަށް މީހުންގެންދިއުމާބެހޭ އުސޫލާ ހިލާފަށް ކަމަށެވެ.

އެ ސަބަބަށްޓަކައި، އެ ކުންފުންޏަށް ދޫކޮށްފައިވާ ހުއްދަ ވަގުތީ ގޮތުން ހިފަހައްޓައި، އެ ކަމާގުޅޭ ގޮތުން އިތުރަށް ސާފުކުރަންޖެހޭ މައުލޫމާތުތަކާއި ބަލަންޖެހޭ ކަންކަން ބެލުމަށްފަހު އުސޫލުގެ ތެރެއިން އަޅަންޖެހޭ ފިޔަވަޅުތައް ކުންފުންޏާ ދެކޮޅަށް އަޅާނެ ކަމަށްވެސް މިނިސްޓްރީން ބުންޏެވެ.

މިނިސްޓްރީން ބުނީ އެ މައްސަލައާ ގުޅިގެން އަބްރާރް ކުންފުނީގެ އުމްރާވެރިންގެ ތެރެއިން މިހާތަނަށް އުމްރާގެ އަޅުކަމަށް ނުފުރި ތިބި އުމްރާވެރިންނަށް އެހީތެރިކަން ފޯރުކޮށްދެވެން ހުރި ގޮތްތަކަކީ ކޮބައިތޯ ބަލައި އެ ހިދުމަތްތައް ފަހިކޮށްދިނުމުގެ މަސައްކަތް ކުރަމުން ގެންދާނެ ކަމަށެވެ.