ބަންޑާރަ މިސްކިތް ތަޅާލުމާ ދެކޮޅަށް އަޑުއުފުލަނީ، މިނިސްޓަރު ވިދާޅުވަނީ ބޮޑުކުރަންޖެހޭ ކަމަށް 

ބަންޑާރަ މިސްކިތް ތަޅާލައި ޒަމާނީ އާ މިސްކިތެއް އެޅުމުގެ މަސައްކަތްކުރާތީ، އެކަމާ ދެކޮޅަށް ސޯޝަލް މީޑިއާގައި އަޑުއުފުލަން ފަށައިފިއެވެ.

އިސްލާމިކް މިނިސްޓަރު ޑރ. ޝަހީމް އަލީ ސައީދު، އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ މާލެ ބަންޑާރަ މިސްކިތް ހުރި ތަނުގައި ޒަމާނީ ބޮޑު މިސްކިތެއް އެޅުމުގެ މަސައްކަތް ރޯދަމަސް ފަހުން ފެށިގެންދާނެ ކަމަށާއި އެކަމަށް ބޭނުންވާ އެހީތެރިކަން ދީލަތި ފަރާތަކުން ހަމަޖެހިފައިވާ ކަމަށެވެ. އަދި އެއާއެކު މާލޭގެ ބޮޑެތި ހުރިހާ މިސްކިތެއް އާވެގެންދާނެ ކަމަށް މިނިސްޓަރު ވިދާޅުވިއެވެ.

އެކަމާ ދެކޮޅަށް އެކްސްގައި ކުރެއްވި ޕޯސްޓެއްގައި ކުރީގެ ހެރިޓޭޖު މިނިސްޓަރު ޔުމްނާ މައުމޫން ވިދާޅުވީ ބަންޑާރަ މިސްކިތް ތަޅައިލުމަކީ އެއްގޮތަކަށްވެސް ކޮށްގެންވާނެ ކަމެއް ނޫން ކަމަށާއި އެއީ 98 އަހަރުވެފައިވާ މާލޭގެ މުހިންމު ދީނީ، ތާރީހީ، ސަގާފީ ބިނާއެއް ކަމަށެވެ.

”ރާއްޖޭގެ މިފަދަ ތާރީހީ ބިނާތަކާއި ސަގާފީ ތަރިކަ ރައްކާތެރިކުރުމަށް ސަގާފީ ތަރިކަ ގާނޫނެއް ހަދައި ތަސްދީގުކުރެވިފައިވާނެ،“ ޔުމްނާ ވިދާޅުވިއެވެ.

އެކަމާ ދެކޮޅަށް ތާރީހު ދިރާސާކުރައްވާ ގިނަ ބޭފުޅުން ދެކޮޅު ހައްދަވަމުން ގެންދަވާ އިރު، މިނިސްޓަރު ޝަހީމް ވިދާޅުވީ ބަންޑާރަ މިސްކިތަށްވުރެ ގިނަ ދުވަސްވެފައި ހުރި މިސްކިތްތައް ވެސް ބޮޑުކޮށް ޒަމާނީކޮށް އާކޮށްފައިވާ ކަމަށާއި އެތަނުގެ އަސްލު ނުގެއްލޭނެހެން ދިވެހި ސަގާފަތާ އެއްގޮތަށް ޑިޒައިންކޮށް ބޮޑު ނުކުރެވެންވީ އެއްވެސް އަސާސެއް ނެތް ކަމަށެވެ.

”ތިއީ މުގައްދަސް ތަނެއް ނޫން. މުގައްދަސް ތަންތަން ވެސް އެއޮތް ބޮޑު ކުރަނީ. އިބްރާހީމްގެފާނު ބިނާކުރެއްވި ގެފުޅުވެސް އެވަނީ ތަރައްގީކޮށްފައި. މަސްޖިދުލްހަރާމް ވެސް، މަސްޖިދުލްނަބަވީ ވެސް.“ މިނިސްޓަރު ވިދާޅުވިއެވެ.

ޝަހީމް ވިދާޅުވީ ބަންޑާރަ މިސްކިތް ވެސް ހުރީ ވޭތުވެދިޔަ އަހަރުތަކުގައި އެކިފަހަރުމަތިން ބޮޑުކޮށްފައި ކަމަށާއި އެތަނަށް މިހާރު 98 އަހަރު ވެފައިވާ އިރު، 100 އަހަރު ވާއިރު ހުންނަންވާނީ ބޮޑުކޮށްފައި ކަމަށެވެ. އަދި ޖާގަ ކުޑަވުމުގެ ސަބަބުން ރޯދަމަސް ނޫން އާންމު ދުވަސްތަކުގައި ވެސް އެ މިސްކިތް ފުރޭކަން މިނިސްޓަރު ފާހަގަކުރެއްވިއެވެ.