ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮފް ކްލައިމެޓް ޗޭންޖުގެ ކޮންފަރެންސް އޮފް ދަ ޕާޓީސް (ކޮޕް)ގެ 31 ވަނަ ސެޝަންގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު މިއަދު ތުރުކީއަށް ފުރާވަޑައިގެންފި އެވެ.
ކޮޕްގެ 31 ވަނަ ސެޝަން ކުރިއަށްދާނީ މިއަދުން ފެށިގެން އަންނަ ހޮނިހިރު ދުވަހުގެ ނިޔަލަށް ތުރުކީގެ އަންތާލިޔާގައެވެ.
ރައީސް އޮފީހުން ބުނީ, މި ދަތުރުފުޅުގައި ރައީސް ރާއްޖޭގެ ފަރާތުން, ގައުމީ ބަޔާން އިއްވަވާނެ ކަމަށެވެ. އަދި މަތީ ފަންތީގެ އެކި ހަރަކާތްތަކާއި މަޝްވަރާތަކުގައި ބައިވެރިވެވަޑައިގަތުމުގެ އިތުރުން, އެހެން ގައުމުތަކުގެ ވެރިންނާއެކު ބައްދަލުވުންތައް ކުރިއަށް ގެންދިއުމަށްވެސް ހަމަޖެހިފައިވާ ކަމަށްވެސް ބުންޏެވެ.
ރައީސް މުއިއްޒު ވަނީ 2023 ވަނަ އަހަރު ޔޫއޭއީގެ ދުބާއީގައި ބޭއްވި ކޮޕް ސަމިޓުގައާއި 2024 ވަނަ އަހަރު އަޒަރުބައިޖާންގެ ބަކޫގައި ބޭއްވި ކޮޕް ސަމިޓުގައިވެސް ބައިވެރިވެވަޑައިގެންފަ އެވެ. ނަމަވެސް މިދިޔަ އަހަރު ބްރެޒިލްގައި ބޭއްވި ކޮޕް ސަމިޓުގައި ބައިވެރިވެވަޑައިގެންފައެއް ނުވެ އެވެ.
1992 ވަނަ އަހަރު ވުޖޫދަށް އައި ޔޫއެންއެފްސީސީސީ މުއާހަދާގެ ދަށުން ބާއްވާ ކޮޕް ސަމިޓަކީ މޫސުމަށް އަންނަ ބަދަލުތަކާ ދެކޮޅަށް ދުނިޔޭގެ ފެންވަރުގައި ކުރެވޭ މަސައްކަތްތައް ހަލުވިކުރުމަށްޓަކައި, ދުނިޔޭގެ ލީޑަރުންނާއި ޔޫއެންއެފްސީސީސީގެ މެންބަރު ގައުމުތަކުގެ މަންދޫބުން އެއްތަނަކަށް ޖަމާވާ ސަމިޓެކެވެ.
