އެމްޑީޕީގެ ރައީސް ކަމަށް ކުރިމަތިލައްވާނެކަން ޝާހިދު އިއުލާން ކުރައްވައިފި

އިދިކޮޅު މައި ޕާޓީ، އެމްޑީޕީގެ ރައީސްކަމުގެ މަގާމަށް ކުރިމަތިލާނެކަން ކުރީގެ ފޮރިން މިނިސްޓަރު އަބްދުﷲ ޝާހިދު މިއަދު އިއުލާން ކުރައްވައިފި އެވެ.

އެމްޑީޕީގެ ރައީސްގެ މަގާމު ހުސްވީ، އެ މަގާމުގައި ހުންނެވި ކުރީގެ ރައީސް މުހައްމަދު ނަޝީދު، އެ ޕާޓީން ވަކިވެވަޑައިގަތުމުންނެވެ. އެހެންވެ އެމްޑީޕީގެ ގައުމީ މަޖިލީހުން ވަނީ ވަގުތީގޮތުން ޕާޓީގެ ރައީސް ކަމުގެ މަގާމަށް ކުރީގެ ރައީސް އިބްރާހީމް މުހައްމަދު ސޯލިހު ހަމަޖައްސަވައިފަ އެވެ.

އެ މަގާމުގައި އަދިވެސް ހުންނެވީ އެ މަނިކުފާނެވެ. އެމްޑީޕީގެ ރައީސްގެ މަގާމަށް ކުރިމަތިލާން ހުޅުވާލީ މި މަހުގެ 13 ވަނަ ދުވަހުން ފެށިގެން އަންނަ އަންގާރަ ދުވަހުގެ ނިޔަލަށެވެ.

އެމްޑީޕީގެ ރައީސްކަމަށް ކުރިމަތިލާން ނިންމާފައިވާކަން އިއުލާންކޮށް ޝާހިދު މިއަދު އެކްސްގައި ކުރެއްވި ޕޯސްޓުގައި އޭނާގެ މޮޓޯއެއްގެ ގޮތުގައި ބޭނުން ކުރައްވާފައިވަނީ ”އާ ބާރެއް“ އެވެ.

”އާ ފޯރިޔަކާއި އާ ޖޯޝަކާއެކު، އާބާރެއްގައި އެމްޑީޕީ ނުކުމެ ރައްޔިތުން އެދޭ މިސްރާބަށް ރާއްޖެ އަލުން ގެންދިއުމަށް އެންމެން އެކުވެ އަތުގުޅާލަން ވެއްޖެކަން ބަލާލި ކޮންމެ ދިމާލަކުން މިއަދު މި އޮތީ ފެންނާށެވެ.،“ ޝާހިދުގެ ޕޯސްޓުގައި ވިދާޅުވެފައިވެ އެވެ.