މެންބަރުކަމަށް ހޮވުނު ކައުންސިލަރުންގެ ދާއިރާތަކުގައި އިންތިހާބު ޖުލައިމަހު ބާއްވަނީ

ވިހިވަނަ ރައްޔިތުންގެ މަޖިލީހުގެ އިންތިހާބުގައި ވާދަކުރެއްވި ބައެއް ކައުންސިލަރުން އިންތިހާބު ކާމިޔާބު ކުރައްވައި، އަދި މިހާރު މެންބަރުކަމުގެ ހުވާ ކުރައްވާފައިވާތީ އެ ދާއިރާތަކުގެ ބައި -އިލެކްޝަންސް ކޮމިޝަން (އީސީ)ބާއްވަން ނިންމައިފިއެވެ.

އީސީން މިއަދު ބުނީ ބައި- އިލެކްޝަން ބާއްވާނީ 2024 ޖުލައި 20 ވާ ހޮނިހިރު ދުވަހު ކަމަށެވެ. އިންތިހާބުގެ ވޯޓުލުން ކުރިއަށް ގެންދިއުމަށް ހަމަޖެހިފައިވަނީ ޖުލައި 20 ވަނަ ދުވަހުގެ ހެނދުނު 8:00 އިން ހަވީރު 4:00 ގެ ނިޔަލަށް ކަމަށާއި އިންތިހާބުގެ ރަސްމީ ނަތީޖާ އިއުލާން ކުރުމަށް ހަމަޖެހިފައިވަނީ 2024 ޖުލައި 22 ވާ ހޯމަ ދުވަހު ކަމަށް އީސީން ބުންޏެވެ.

ބައި- އިލެކްޝަން ބާއްވާ ދާއިރާތަށް:
– ޅ އަތޮޅު ކައުންސިލް ރައީސް
– ފ. ބިލެތްދޫ ކައުންސިލް ރައީސް
– ކުޅުދުއްފުށި ސިޓީ ކައުންސިލް މެންބަރު (ކުޅުދުއްފުށި އުތުރު ދާއިރާ)
– ރ. ހުޅުދުއްފާރު ކައުންސިލް މެންބަރު
– މާލެ ސިޓީ ކައުންސިލް މެންބަރު (ހެންވޭރު ހުޅަނގު ދާއިރާ)
– މާލެ ސިޓީ ކައުންސިލް މެންބަރު (މައްޗަންގޮޅި މެދު ދާއިރާ)
– މާލެ ސިޓީ ކައުންސިލް މެންބަރު (ހުޅުމާލެ ދާއިރާ)
– ރ. ރަސްމާދޫ ކައުންސިލް މެންބަރު (އަންހެނުންނަށް ހާއްސަކޮށްފައިވާ ގޮނޑި)

އެ ދާއިރާތަކުގެ ބައި އިލެކްޝަންގައި ވާދަކުރުމަށް އެދި ހުށަހަޅާ ފޯމު www.elections.gov.mv އިން ޑައުންލޯޑް ކުރެވެން ހުންނާނެ ކަމަށް އީސީން ބުންޏެވެ.