ރާއްޖޭގައި މިހާތަނަށް ހިންގި އެންމެ ބޮޑު ހިޔާނާތް، އެމްއެމްޕީއާރުސީ ވައްކަމުގެ މައްސަލަ އަލުން ބަލައި، އެކަމުގައި ބައިވެރިވި މީހުންނަށް ހައްގު އަދަބު ދޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވި ނަމަވެސް އެ މައްސަލަތައް ނުބެލޭނެ ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
ޔާމީންގެ ފަސް އަހަރުގެ ވެރިކަމުގެ ދުވަސްވަރު އެމްއެމްޕީއާރުސީގެ ހިޔާނާތުން ގެއްލުނު ފައިސާ ހޯދައި، ކުށްވެރިވާ މީހުންނަށް ހައްގު އަދަބު ދޭނެ ކަމަށް ރައީސް މުއިއްޒު ވިދާޅުވީ މި މަހުގެ ހަތް ވަނަ ދުވަހު ބޭއްވި ޕީއެންސީގެ ހަރުގެ ޖަލްސާއެއްގަ އެވެ.
ރޭ ބޭއްވި ޕީއެންއެފްގެ ފްރަންޓު އޮފީސް ޖަލްސާގައި ޔާމީން ވިދާޅުވީ އެމްއެމްޕީއާރުސީގެ ވައްކަމުގެ މައްސަލަ ބަލާނެ ކަމަށް ރައީސް މުއިއްޒު ވިދާޅުވުމުން އެ ވަގުތު ޕީއެންސީގެ ޖަގަހައިގައި ތިއްބެވި ބޭފުޅުންނަށް އެކަން ބަލައިގަންނަން ފަސޭހައެއް ނުވި ކަމަށާއި އެ ބޭފުޅުންގެ މޫނުމަތިން ފެނުނީ ހިތްނުތަވަސްކަމާއި ނަފުރަތާއި އުދާސްތައް ކަމަށެވެ.
އަދި އެ ވައްކަމުގައި ބައިވެރިވުމުގެ ތުހުމަތު މި ސަރުކާރުގެ އިސް ވެރިންނަށް ކުރެވޭ އިރު، ސަރުކާރުގެ ސުޕާ މެޖޯރިޓީ ރައްޔިތުންގެ މަޖިލީހުގައި އޮވެގެން، ފުލުހުންނަކަށް ވެސް އަދި އެންޓި ކޮރަޕްޝަން ކޮމިޝަން (އޭސީސީ) އަކަށް ވެސް އެ ވައްކަމުގެ މައްސަލަތަކެއް ނުބެލޭނެ ކަމަށްވެސް ވިދާޅުވި އެވެ.
”އެމްއެމްޕީއާރުސީގެ މައްސަލަތަކެއް ދެނެއް މި ސަރުކާރުގެ ސުޕަ މެޖޯރިޓީ އޮވެގެން އަދި އަބްދުއްރަހީމް ކަހަލަ މީހުން އަދި ލިސްޓުތައް އައިއިރު ނައިބު ރައީސްއާއި އެތައް ބައިވަރު މީހަކު އޮތް. ފުލުހުންނަކަށް ނުބެލޭނެ. މިއެއް ނުބެލޭނެ ފުލުހުންނަކަށް. އޭސީސީއަކަށް މައްސަލައެއް ނުބެލޭނެ. މާލޭ ސިޓީ ކައުންސިލުގައި ހުރި އެއްވެސް ކޮރަޕްޝަންގެ މައްސަލައެއް އެއްވެސް ތާކަށް ނުބެލޭނެ،“ ޔާމީން ވިދާޅުވި އެވެ.
އެ މަނިކުފާނު ވަނީ، މުއައްސަސާތައް ގާނޫނުއަސާސީން ކަނޑައަޅާފައި ހުއްޓަސް އެ މުއައްސަސާތަކަށް ނުފޫޒެއް ނެތި މައްސަލަ ބެލޭނެ ގޮތް ފަހިކޮށް ނުދެވޭނަމަ މިނިވަން ރިޔާސީ ކޮމިޝަނެއް އެކުލަވާލައިގެން އެކަން ކުރައްވަން ރައީސް މުއިއްޒަށް ގޮވާލައްވައި، އެކަމަށް ޗެލެންޖު ކުރައްވައިފަ އެވެ.
ޔާމީން ވިދާޅުވި ގޮތުގައި، އެ ކޮމިޝަންގައި ބަންޑާރަ ނައިބާއި ޕްރޮސެކިއުޓާ ޖެނެރަލް ތިއްބެވުމަށް އެ މަނިކުފާނުގެ އިއުތިރާޒެއް ނެތެވެ. ނަމަވެސް އެ ކޮމިޝަންގައި ދެން ތިއްބަވަން ޖެހޭނީ ސަރުކާރަށާއި ސަރުކާރު ހިންގާ ޕާޓީތަކަށް ނިސްބަތް ނުވާ، މިނިވަން މީހުން ކަމަށާއި މައްސަލައިގެ ތަހުގީގު ރައްޔިތުން ބަލައިގަންނާނީ އޭރުން ކަމަށް ވިދާޅުވި އެވެ.
އެހެން ވިދާޅުވުމަށްފަހުވެސް ޔާމީން ވަނީ އެމްއެމްޕީއާރުސީގެ ވައްކަމުގެ މައްސަލަ ރައީސް މުއިއްޒަށް ނުބެލޭނެ ކަމަށް ތަކުރާރުކޮށް ވިދާޅުވެފަ އެވެ.
”މިހާރުވެސް މުއިއްޒުގެ އަރިހުގައި ތިއްބެވި ބޮޑުންގެ ތެރޭގައި އެ އޮތީ ކޮރަޕްޝަން. އަޅުގަނޑު މިތަނުގައި އެއްފަހަރަށްވުރެ ގިނަ ފަހަރު ވާހަކަ ދައްކަމުން ދިޔައިން މިހާރު އެ ހުރި ފޮރިން މިނިސްޓަރު މޫސާ ޒަމީރު، އަރިއަތޮޅުގެ ފަޅެއް އޭނަގެ އަންހެނުންގެ ދޮންބައްޕަގެ ނަމުގައި ނަގާފަ، ލިކުއިޑޭޓްކޮށް ހުރިހާ ލާރިއެއް ނަގައިގެން އެ ހުރީ މޫސާ ޒަމީރު. އޭނަގެ އެކައުންޓުގައި އެ ހުރީ ފައިސާ. ދެން ކޮން ވާހަކައެއްތޯ މި ދައްކަނީ. ދުވަހަކުވެސް ކޮރަޕްޝަން މީހަކަށް ނުބެލޭ ވަރަށް ބަލާނަމޭ. ރައްޔިތުންގެ މަޖިލީހުގެ ރައީސް އަބްދުއްރަހީމްގެ ވާހަކަ އޮއިއްޓޭގެ ބަޔާނުގައި އޮތް ވާހަކަ. ކިހިނެތްތޯ މި ކަހަލަ ކަންތައް ބަލާނީ މުއިއްޒު. މުއިއްޒަކަށް ނުބެލޭނެ މި ކަންކަމެއް. ހުދު މުއިއްޒާ ގުޅޭ ސިޓީ ކައުންސިލުގެ މައްސަލަތައް އެ ހުރީ އިނގޭތޯ. އެންމެ ގިނައީ. މިއިން އެއްވެސް މައްސަލައެއް ބެލިއަކަ ނުދޭނެ،“ ޔާމީން ވިދާޅުވި އެވެ.
90 Comments
ގުޅުންހުރި
މަޖިލިސް މެންބަރުންގެ ގޮނޑި ގެއްލޭ ގޮތަށް ގެނައި އިސްލާހު ބާތިލުކުރަން ސުޕްރީމް
ކަނޑުހުޅުދޫގައި ޑުރަގު މައްސަލައެއްގައި ތޫނު ހަތިޔާރު ބޭނުންކޮށްގެން މާރާމާރީއެއް ހިންގައިފި
ފުރުގާން މިސްކިތަށް ބޮޑެތި ގެއްލުންތަކެއް ދީފި، ހަތިމުތައް ހުރީ އުކާލާފައި
ޕްރައިމަރީއަކާނުލައި ނެތި ރިޔާސީ ޓިކެޓް ރައީސްއަށް ލިބިވަޑައިގަންނަވާނެ: އަބްދުއްރަހީމް
ފުރުސަތު ލިބުނަސް ރައީސުލްޖުމްހޫރިއްޔާގެ މަގާމަށް ވާދަނުކުރައްވާނަން: އަބްދުއްރަހީމް
ގެއަކަށް ވެއްދުމަށްފަހު އޮރިޔާންކޮށް، ފޭރުން: މަންމައާއި ދަރިފުޅު އެއް އަހަރަށް ޖަލަށް