ޒަމީރާއި މުނައްވަރު ސައުދީ އަށް، ބޮޑުވަޒީރު މުހައްމަދަށް ރައީސްގެ ސިޓީފުޅެއް ރައްދުކުރާނެ

ފޮރިން މިނިސްޓަރު މޫސާ ޒަމީރާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު ރަސްމީ ދަތުރެއްގައި މިއަދު ސައުދީ އަރަބިއާއަށް ފުރާވަޑައިގެންފި އެވެ.

ފޮރިން މިނިސްޓްރީން ބުނީ، ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން އަލް ސައުދުގެ ދައުވަތަކަށް ޒަމީރު ކުރައްވާ ފަސް ދުވަހުގެ އެ ދަތުރުގައި އެ ގައުމުގެ ވަލީއަހުދު އަދި ބޮޑުވަޒީރު ޕްރިންސް މުހައްމަދު ބިން ސަލްމާން ބިން އަބްދުލްއަޒީޒް އަލް ސައުދަށް އެޑްރެސްކުރައްވާ ރައީސް ޑރ. މުހައްމަދު މުއިއްޒު ފޮނުއްވާ ސިޓީފުޅެއް ޒަމީރު ރައްދުކުރައްވާނެ ކަމަށެވެ.

އޭގެ އިތުރުން:

ސައޫދީގެ ފޮރިން މިނިސްޓަރާ ބައްދަލުކުރައްވާނެ
ސައޫދީގެ ސަރުކާރުގެ އެހެނިހެން އިސް ވެރިންނާ ބައްދަލުކުރައްވާނެ
ސައޫދީ ފަންޑް ފޯ ޑިވެލޮޕްމަންޓްއާ ބައްދަލުކުރައްވާނެ
ރިޔާދުގައި ދިރިއުޅޭ ދިވެހިންނާ ބައްދަލުކުރައްވާނެ

ފޮރިން މިނިސްޓްރީން ބުނީ ޒަމީރުގެ ދަތުރުގައި މުނައްވަރުގެ އިތުރުން މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދާއި ފޮރިން މިނިސްޓްރީގެ އެމްބެސެޑާ އެޓް ލާޖް އަހުމަދު ނަސީރާއި ޖޮއިންޓް ސެކްރެޓަރީ ބަދުރާ ސައީދާއި ޑިރެކްޓަރު ޖެނެރަލް އާއިޝަތު ފަރީނާ ބައިވެރިވެވަޑައިގަންނަވާ ކަމަށެވެ.