ކެއްސުމަށް ދޭ ބޭހެއްގައި ކުނޑި ކޮޅުތަކެއް، ވިއްކުމާއި ބޭނުންކުރުން މަނާކޮށްފި

ރާއްޖެ އެތެރެކޮށް ބޭނުންކުރާ ބޭހެއްގައި ކުނޑި ކޮޅުތަކެއް ހުންނަކަން ފާހަގަކުރެވިގެން އެ ބޭސް ވިއްކުމާއި ބޭނުންކުރުން މަނާކޮށްފި އެވެ.

ކުނޑިކޮޅުތަކެއް ފެނިފައިވަނީ ކެއްސުމަށް ދޭ ބޭހެއް ކަމަށްވާ ކޮފްސީ ސިރަޕްގެ 100 އެމްއެލް ބޭހުންނެވެ. އެ ބޭސް އުފައްދަނީ އިންޑިއާގެ ޗެންނާއީގައި ހުންނަ އެމްއެމްސީ ހެލްތް ކެއާ ލިމިޓެޑުންނެވެ.

މިކަމާ ގުޅިގެން މޯލްޑިވްސް ފުޑް އެންޑް ޑްރަގް އޮތޯރިޓީން ނެރުނު އިއުލާނެއްގައި ބުނެފައިވަނީ، އެ ބޭހުގެ ރައްކާތެރިކަން ކަށަވަރުކުރުމަށްޓަކާ ކަންކަން އިތުރަށް ބެލުމުގެ މަސައްކަތް ކުރާ ކަމަށެވެ.

ވިމާ، އެ މައްސަލަ އޮތޯރިޓީން ބެލުމަށްފަހު ވަކި ގޮތެއް އަންގަންދެން އެ ބޭސް ރާއްޖެ އެތެރެކުރުމާއި ވިއްކުމާއި ބޭނުންކުރުން އޮތޯރިޓީން ވަނީ މަނާކޮށްފަ އެވެ.