މާލޭގައި ދުއްވާ އެހެން ޒޯންތަކުގެ އުޅަނދުތައް ހުޅުމާލެ ގެންދަން އަންގައިފި، ލިބޭނީ 40 ދުވަސް!

ރަޖިސްޓްރީ ނުކޮށް މަގުތަކުގައި ދުއްވާ އަދި ޕާކުކުރާ އުޅަނދުތަކާއި މާލޭ ޒޯނުގައި ދުއްވާ އެހެން ޒޯންތަކުގައި ރަޖިސްޓްރީ ކޮށްފައިވާ އުޅަނދުތައް ދުއްވުމާއި ޕާކު ކުރުމާއި ބޭނުންކުރުން ހުއްޓުވައި އެ އުޅަނދުތައް ގާނޫނާއި ގަވާއިދުގެ ތެރެއަށް ގެނައުމުގެ ފުރުސަތު ދިނުމުގެ ގޮތުން އެ ވެހިކަލްތައް ވަގުތީ ގޮތުން ޕާކު ކުރުމަށް ދީފައިވަނީ ހުޅުމާލޭގެ ލޮޓް ނަންބަރު 452 ބިމެވެ.

ޓްރާންސްޕޯޓް މިނިސްޓްރީން އިއްޔެ ވަނީ، އެފަދަ އުޅަނގުތައް ވީ އެންމެ އަވަހަކަށް އެ ބިމަށް ގެންގޮސް، އެއްގަމު ދަތުރުފަތުރުގެ ގާނޫނާއި ގަވާއިދުތަކުގައިވާ ގޮތުގެމަތިން އުޅަނދާ ގުޅިގެން ފުރިހަމަކުރަންޖެހޭ އެންމެހާ ކަންކަން ވީ އެންމެ އަވަސް ފުރުސަތެއްގައި ނިންމުމަށް އަންގައިފަ އެވެ. އަދި އެ އެންގުމާ ހިލާފުވާ އުޅަނދުތަކާމެދު ގާނޫނާއި ގަވާއިދުގެ ދަށުން ފިޔަވަޅު އަޅާނެ ކަމަށްވެސް ބުންޏެވެ.

މާލެއަށް ދިމާވެފައިވާ ޓްރެފިކް މައްސަލަ ހައްލުކުރަން މުއައްސަސާތަކުން މި މަހުގެ 15 ގައި ބޭއްވި މަޝްވަރާ ބައްދަލުވުމަށްފަހު ނޫސްވެރިންނަށް މައުލޫމާތު ދެއްވަމުން ޓްރާންސްޕޯޓް މިނިސްޓަރު މުހައްމަދު އަމީން ވަނީ މާލެ ސަހައްދުގައި ދުއްވާ އެހެން ޒޯންތަކުގެ ރަޖިސްޓްރީ އޮންނަ އުޅަނދުތައް އެޗްޑީސީން ދައްކާ ބިމަކަށް އަމިއްލައަށް ގެންގޮސް ބާއްވައިގެން، ރަޖިސްޓަރީ ކުރަން ހަ މަސް ދުވަހުގެ މުއްދަތެއް ދޭން ނިންމާފައިވާ ކަމަށް ވިދާޅުވެފައެވެ.

އެޗްޑީސީން ކަނޑައަޅާ ބިމަށް އެފަދަ ވެހިކަލް ގެންދިއުމަށް ދޭން ނިންމާފައިވަނީ 40 ދުވަހެވެ. އެއަށްފަހު މާލޭގައި ދުއްވާ އެހެން ޒޯންތަކުގެ ރަޖިސްޓަރީ އޮންނަ ވެހިކަލްތައް ޓޯ ކުރަން ފަށާނެ ކަމަށް ހޯމް މިނިސްޓްރީން ބުނެއެވެ.