ދެ ޓީޗަރަކު ދަރިވަރުން ގައިގައި އަތްލި މައްސަލަތަކެއް، ބިދޭސީ ޓީޗަރަކު ހައްޔަރަށް

އުތުރުގެ ރަށެއްގެ ސްކޫލެއްގައި ދަރިވަރެއްގެ ގައިގައި އަތްލި ބިދޭސީ ޓީޗަރަކު ހައްޔަރުކޮށްފިއެވެ.

ފުލުހުން ބުނީ އުތުރުގެ ރަށެއްގެ ސްކޫލު ދަރިވަރެއްގެ ގައިގައި ޓީޗަަރަކު އަތްލައި، ދަރިވަރަކާ ދައްކަން ނުޖެހޭފަދަ ވާހަކަތައް ދެއްކުމުގެ އިތުރުން ދަރިވަރަށް ބިރުދައްކާފައިވާ ކަމަށް ތުހުމަތުކުރެވޭ މައްސަލައެއް މިމަހު ފުލުހުންނަށް ހުށަހަޅާފައިވާ ކަމަށެވެ.

އެ މައްސަލައާ ގުޅިގެން އިންޑިއާއަށް ނިސްބަތްވާ 54 އަހަރުގެ މީހަކު މިއަދު ހައްޔަރުކޮށްފައިވާ ކަމަށް ފުލުހުން ބުންޏެވެ.

އޭގެ އިތުރުން ވެސް އުތުރުގެ ރަށެއްގެ ސްކޫލެއްގައި ޓީޗަރަކު ދަރިވަރެއްގެ ގައިގައި އަތްލި ކަމަށް ތުހުމަތުކުރެވޭ އެހެން މައްސަލައެއް ވެސް މިމަހުގެ 15 ވަނަ ދުވަހު ހުށަހަޅާފައިވާ ކަމަށާއި އެ މައްސަލަ ވެސް ތަހުގީގުކުރަމުންދާ ކަމަށް ފުލުހުން ބުންޏެވެ.

އެ މައްސަލައިގައި އެ ޓީޗަރު މިހާރު ވަނީ ސަސްޕެންޑުކޮށްފައެވެ.