ތޫފާން ”ޑިޓްވާ“ އާ ގުޅިގެން އަވަށްޓެރި ސްރީ ލަންކާއަށް ކުރަމުންދާ ވިއްސާރައާ ގުޅިގެން، އެ ގައުމަށް އެހީގެ ގޮތުގައި ބޭންކް އޮފް މޯލްޑިވްސް (ބީއެމްއެލް) އިން 25،000 ޑޮލަރު ހަދިޔާކޮށްފިއެވެ.
ޕަބްލިކް ސާވިސް މީޑިއާ (ޕީއެސްއެމް) އިން އިސްނަގައިގެން ކުރިއަށްގެންދާ ”ސިލޯނާއެކު ދިވެހިން“ ޓެލެތޯންގެ ފަންޑަށް ބީއެމްއެލްގެ ފަރާތުން މިއަދު 25،000 ޑޮލަރު ހަވާލުކޮށްދެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފެވެ.
ބީއެމްއެލުން ބުނީ މި ދަތި ދަނޑިވަޅުގައި، ލަންކާގެ ރައްޔިތުންނާއެކު ދުއާތަކާއި ހެޔޮ އެދުންތައްވާ ކަމަށެވެ.
”ސިލޯނާއެކު ދިވެހިން“ ޓެލެތޯންގެ ފަންޑަށް މިހާތަނަށް ގިނަ ފަރާތްތަކަކުން ވަނީ އެހީތެރިކަން ފޯރުކޮށްދީފައެވެ. އެގޮތުން އެ ފަންޑަށް މިހާތަނަށް ވަނީ 2.9 މިލިއަން ރުފިޔާ އާއި 38،000 އަށްވުރެ ގިނަ ޑޮލަރު ލިބިފައެވެ.
އެ އެހީތަކުގެ އިތުރުން ދިވެހި ސަރުކާރުން ވެސް ވަނީ ލަންކާއަށް އެހީގެ ގޮތުގައި 50،000 ޑޮލަރު ހަދިޔާކުރުމަށް ނިންމައިފައެވެ. އޭގެ އިތުރުން 25،000 މަސްދަޅު ކޭސް ހަދިޔާކުރަން ވެސް ވަނީ ނިންމައިފައެވެ.
ތޫފާން ”ޑިޓްވާ“ އާ ގުޅިގެން އެތައް ބަޔަކަށް ގެއްލުންވެ، މަރުވި މީހުންގެ އަދަދު ވަނީ 300 އަށްވުރެ މައްޗަށް އަރައިފައެވެ.




ގުޅުންހުރި
ސަން ސިޔާމްގެ ފަރާތުން ލަންކާއަށް ދެ ލައްކަ ޑޮލަރު
ތޫފާނުގައި ލަންކާ އިން މަރުވި މީހުންގެ އަދަދު 193 އަށް, 200
ލަންކާގެ މުސްކުޅިންގެ ސެންޓަރަކުން 11 މަރު, އެންމެން މަރުވީ ފެންބޮޑުވެ ނުނިކުމެވި
ލަންކާގައި ކުއްލި ނުރައްކަލުގެ ހާލަތު އިއުލާންކޮށްފި
ލަންކާއަށް އެހީވާން 50،000 ޑޮލަރާއި 25،000 މަސްދަޅު ކޭސް ދެނީ
ލަންކާ އިން ގެއްލުނު ދިވެހި އާއިލާ ފެނިއްޖެ