ސަން ސިޔާމްގެ ފަރާތުން ލަންކާއަށް ދެ ލައްކަ ޑޮލަރު

ތޫފާން ”ޑިޓްވާ“ އާ ގުޅިގެން އަވަށްޓެރި ސްރީ ލަންކާއަށް ކުރަމުންދާ ވިއްސާރައާ ގުޅިގެން، އެ ގައުމަށް އެހީގެ ގޮތުގައި ދެ ލައްކަ ޑޮލަރު ދިނުމަށް، ސަން ސިޔާމް ގްރޫޕުގެ ބާނީ އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދު (ސަން ސިޔާމް) ނިންމަވައިފިއެވެ.

ސިޔާމް ވަނީ މިއަދު ލަންކާއިން ރާއްޖެއަށް ކަނޑައަޅާފައި ހުންނަވާ ސަފީރު މުހައްމަދު ރިޒްވީ ހަސަންއާ ބައްދަލުކުރައްވައިފައެވެ. އެ ބައްދަލުކުރެއްވުމުގެ ތެރެއިން ސިޔާމް ވަނީ ދެ ލައްކަ ޑޮލަރުގެ ތެރެއިން 75،000 ޑޮލަރު، ސަފީރާ ހަވާލުކުރައްވައިފައެވެ.

ސިޔާމް އެކްސްގައި ކުރެއްވި ޕޯސްޓެއްގައި ވަނީ، ”ދިތުވާ“ގެ ސަބަބުން ލަންކާއަށް ކުރިމަތިވެފައިވާ ހާލަތުން އަރައިގަތުމުގެ މަސައްކަތްތަކަށް ފައިސާގެ އެހީތެރިކަން ފޯރުކޮށްދެއްވާނެ ކަމަށާއި އިންސާނީ އެހީގެ ގޮތުގައި 200,000 އެމެރިކާ ޑޮލަރު ދޭނެކަމުގެ ޔަގީންކަން އަރުވާފައިވާނެ ކަމަށެވެ.

ލަންކާއަށް އިތުރު އެހީތެރިކަން ފޯރުކޮށްދިނުމުގެ ގޮތުން ސަން ސިޔަމް ގްރޫޕްގެ ތެރޭގައި ފަންޑް ރައިޒިން ޕްރޮގްރާމެއްވެސް ފައްޓަވާނެ ކަމަށް ސިޔާމް ވިދާޅުވިއެވެ.

ލަންކާއަށް އެހީތެރިވުމުގެ ގޮތުން، ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) އިން އިސްނަގައިގެން ވެސް ދަނީ ”ސިލޯނާއެކު ދިވެހިން“ގެ ނަމުގައި ޓެލެތޯނެއް ކުރިއަށްގެންދަމުންނެވެ. އެގޮތުން އެ ޓެލެތޯންގެ ފަންޑަށް މިހާތަނަށް ވަނީ 2.9 މިލިއަން ރުފިޔާ އާއި 38،000 އަށްވުރެ ގިނަ ޑޮލަރު ލިބިފައެވެ.

އެ އެހީތަކުގެ އިތުރުން ދިވެހި ސަރުކާރުން ވެސް ވަނީ ލަންކާއަށް އެހީގެ ގޮތުގައި 50،000 ޑޮލަރު ހަދިޔާކުރުމަށް ނިންމައިފައެވެ. އޭގެ އިތުރުން 25،000 މަސްދަޅު ކޭސް ހަދިޔާކުރަން ވެސް ވަނީ ނިންމައިފައެވެ.

ތޫފާން ”ޑިޓްވާ“ އާ ގުޅިގެން އެތައް ބަޔަކަށް ގެއްލުންވެ، މަރުވި މީހުންގެ އަދަދު ވަނީ 300 އަށްވުރެ މައްޗަށް އަރައިފައެވެ.