”ސިލޯނާއެކު ދިވެހިން“ ފަންޑަށް ސްޓެލްކޯއިން 250،000 ރުފިޔާ

ތޫފާން ”ޑިޓްވާ“ އާ ގުޅިގެން އަވަށްޓެރި ސްރީ ލަންކާއަށް ކުރަމުންދާ ވިއްސާރައާ ގުޅިގެން، އެ ގައުމަށް އެހީގެ ގޮތުގައި ސްޓެލްކޯއިން 250،000 ރުފިޔާ ހަދިޔާކޮށްފިއެވެ.

ދައުލަތުގެ މީޑިއާ، ޕަބްލިކް ސާވިސް މީޑިއާ (ޕީއެސްއެމް) އިން އިސްނަގައިގެން ކުރިއަށްގެންދާ ”ސިލޯނާއެކު ދިވެހިން“ ޓެލެތޯންގެ ފަންޑަށް ސްޓެލްކޯގެ ފަރާތުން 250،000 ރުފިޔާ ހަދިޔާކޮށްދެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ޝަމާހް ޝަރީފެވެ.

ސްޓެލްކޯއިން ބުނީ އެ ފައިސާގެ އެހީތެރިކަމަކީ ލަންކާގެ ރައްޔިތުންނަށް އެހީތެރިވުމުގެ ގޮތުން އެ ކުންފުނީގެ މެނޭޖްމަންޓާއި މުވައްޒަފުންގެ ފަރާތުން ދޭ އެހީއެއް ކަމަށެވެ.

”ސިލޯނާއެކު ދިވެހިން“ ޓެލެތޯންގެ ފަންޑަށް މިހާތަނަށް ގިނަ ފަރާތްތަކަކުން ވަނީ އެހީތެރިކަން ފޯރުކޮށްދީފައެވެ. އެގޮތުން އެ ފަންޑަށް މިހާތަނަށް ވަނީ 3.8 މިލިއަން ރުފިޔާ އާއި 38،000 އަށްވުރެ ގިނަ ޑޮލަރު ލިބިފައެވެ.

އެ އެހީތަކުގެ އިތުރުން ދިވެހި ސަރުކާރުން ވެސް ވަނީ ލަންކާއަށް އެހީގެ ގޮތުގައި 50،000 ޑޮލަރު ހަދިޔާކުރުމަށް ނިންމައިފައެވެ. އޭގެ އިތުރުން 25،000 މަސްދަޅު ކޭސް ހަދިޔާކުރަން ވެސް ވަނީ ނިންމައިފައެވެ.

ތޫފާން ”ޑިޓްވާ“ އާ ގުޅިގެން އެތައް ބަޔަކަށް ގެއްލުންވެ، މަރުވި މީހުންގެ އަދަދު ވަނީ 300 އަށްވުރެ މައްޗަށް އަރައިފައެވެ.