ރައީސްގެ ނަސޭހަތް: މުސްތަގުބަލަށް ގުޑުވައިނުލެވޭވަރުގެ ބިންގަލެއް އެޅޭނީ ބަސް އަހައިގެން

މުސްތަގުބަލަށް ގުޑުވައިނުލެވޭވަރުގެ ވަރުގަދަ ބިންގަލެއް އެޅޭނީ ޓީޗަރުންގެ ބަސް އަހައިގެން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ހުޅުމާލޭ ފޭސް ދޭއްގައި އިމާރާތްކުރި ޝަހީދު އަލީ ސްކޫލު ހުޅުވުމަށް މިއަދު ހެނދުނު ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ ހުރިހާ ކުދިންވެސް ނަމާދަށް ފަރުވާތެރިކަން އަދާކުރަންޖެހޭނެ ކަމަށާއި މައިންބަފައިންނަށް ކިޔަމަންތެރިވާންޖެހޭނެ ކަމަށެވެ.

ސްކޫލްތެރޭގައި އަދި ތައުލީމީ ހަޔާތުގައި ޖުމުލަކޮށް ކަންކަން ކުރަންވާނީ ޓީޗަރުން ބުނާބަސް އަހައި، ސްކޫލްގެ ވެރިން އަންގާ މަގުން ކަމަށް އެ މަނިކުފާނު ވިދާޅުވިއެވެ.

”އޭރުން އަޅުގަނޑުމެންގެ ތުއްތުކުދިންގެ މުސްތަގުބަލަށް އެ އެޅިގެންދަނީ ގުޑުވައިނުލެވޭވަރުގެ ވަރުގަދަ ބިންގަލެއް. ރެނދު އަޅުވައިނުލެވޭވަރުގެ ވަރުގަދަ ފައުންޑޭޝަނެއް އޭރުން އެ އެޅެނީ. ތިޔަ ކުދިން ކިޔަވައިގެން ނުކުމެ، ބޮޑެތި މީހުންނަށްވެ، ކުރިއަށްދާން ބަލާއިރުގައި، ބިންގާ އޮތީ ވަރަށް ވީކްކޮށް، ނޫނީވިއްޔާ ރެނދު އަޅާފައި ކަމަށްވަންޏާ، ހަޔާތުގައި ގެއްލުންތަކެއް ވެދާނެ،“ އެ މަނިކުފާނު ވިދާޅުވިއެވެ.

ރައީސް ވިދާޅުވީ ސްކޫލަށް ދަނީ އަދި ކިޔަވަން ދަނީ އެ ބިންގާ ވަރުގަދައަށް އެޅުމަށްޓަކައި ކަމަށާއި އެ ބިންގާ އަމިއްލައަށް ވަރުގަދަކުރުމާއި އަދި އެކަމަށް މަގު ދެއްކުމަކީ ކޮންމެ ޓީޗަރެއްގެވެސް، ބެލެނިވެރިއެއްގެވެސް ޒިންމާއެއްކަން ދަންނަންވާނެ ކަމަށެވެ.

ސަރުކާރުން މަސައްކަތް ކުރަމުންދާނީ، އެ ހުރިހާ ކަމަކަށް މަގުފަހިކޮށްދިނުމަށްޓަކައި، ކަންކަން ތަރުތީބު ކުރަމުން ކަމަށާއި އެއީ އިންފްރާސްޓްރަކްޗާ މަޝްރޫއުތައް ހިންގުން ކަމުގައިވިޔަސް، އަދި ނިޒާމީގޮތުން ތައުލީމީ ނިޒާމު ވަރުގަދަކުރަން ކުރެވޭ އެކި ކަހަލަ ކަންތައް ކަމުގައިވިޔަސް، ކުރިއަށް ގެންގޮސްދޭނެ ކަމަށް އެ މަނިކުފާނު ވިދާޅުވިއެވެ.

”ހާއްސަގޮތެއްގައި އިންކްލޫސިވިޓީ ޔަގީންކުރުމަށްޓަކައި. މުޖުތަމައުގައި އުޅޭ ނުކުޅެދުންތެރިކަން ހުންނަ ކުދިންނާއި، ފަރާތްތައްވެސް، އަދި އެކި ކަހަލަ ޑިސްއެބިލިޓީސްތައް، ނޫނީވިއްޔާ އެކިގޮތްގޮތުން މާޖިނަލައިޒް ވެފައި ތިބޭ ކުދިންނާއި ފަރާތްތައްވެސް. އެހެންވީމާ، އިންކްލޫސިވް އެޑިއުކޭޝަނަކީ، މި ސަރުކާރުގެ މުހިންމު ސިޔާސަތެއް. މި ސްކޫލްގައިވެސް އެ ފެސިލިޓީޒް ގާއިމުވެފައި މިހުރީ،“ އެ މަނިކުފާނު ވިދާޅުވިއެވެ.

ރައީސް އިތުރަށް ވިދާޅުވީ އިތުރު ސްކޫލުތައް ތަރައްގީކުރުމުގެ މަސައްކަތްތައް ވެސް ކުރިއަށް އެބަހުރި ކަމަށާއި ހުޅުމާލޭ ފޭސް ދޭއް ގައިވެސް އަދި ފޭސް ތިނެއްގައިވެސް ސްކޫލް އެޅުމާއި، ތައުލީމީ ނިޒާމުގެ ތެރެއިން ކުރަންހުރި ކަންކަންވެސް އޮތީ ކުރިއަށް ކަމަށެވެ.