Search
Close this search box.

ސަސްޓެއިނަބުލް ޓައުންޝިޕް މަޝްރޫއުގެ އަމަލީ މަަސައްކަތް ފަށައިފި

މީހުން ދިރިއުޅޭ އަދި ޓޫރިޒަމްގެ ވަސީލަތްތަކާއި އިގުތިސާދީ އެހެން ބައެއް މަސައްކަތްތައް ވެސް ކުރާ ގޮތަށް ”ސަސްޓެއިނަބުލް ޓައުންޝިޕް“ އެެއް ތަރައްގީ ކުރަން ސަރުކާރުން ފުރަތަމަ ފަހަރަށް ހުއްދަ ދިން ކްރިސްޓަލް ހޯލްޑިންސް އިން ނ. އަތޮޅުގައި ގާއިމްކުރާ ޓައުންޝިޕްގެ އަމަލީ މަސައްކަތް ރަސްމީކޮށް މިއަދު ފަށައިފި އެވެ.

ނ. އަތޮޅު ކުރަމާދޫ އާއި ދެކެނަންފަރާއި ދިގުފަރުގައި ”އައިލާ މޯލްޑިވްސް“ ގެ ނަމުގައި ހިންގާ އެ ޕްރޮޖެކްޓްގެ އަމަލީ މަސަައްކަތް ރަސްމީކޮށް ފަށްޓަވައިދެއްވީ ރައީސް ޑރ. މުހައްމަދު މުއިޒު އެވެ.

އެ ސަރަހައްދުގައި ހިއްކާފައިވާ ބިމެއްގައި ބޭއްވި އެ ރަސްމިއްޔާތުގައި ކްރިސްޓަލް ހޯލްޑިންސްގެ ސީއީއޯ ޕެޓާ ކާސްޓިކް ވިދާޅުވީ މި ޓައުންޝިފަކީ ރައީސް ޑރ. މުއިއްޒުގެ އިސްނެންގެވުމުގެ ދަށުން ކުރަމުންދާ މަސައްކަތެއް ކަމަށެވެ. އަދި މިއީ ރައީސް ޑރ. މުއިއްޒުގެ ހުވަފެނެއް ކަމަށާއި އެ ހުވަފެން ހަގީގަތަށް ވުމުގެ މަސައްކަތް ފެށިފައިވާ ކަމަށް އޭނާ ވިދާޅުވިއެވެ.

”މި މަޝްރޫއުން ދައްކުވައި ދެނީ ރައީސް ޑރ. މުއިއްްޒުގެ ވަރުގަދަ ލީޑާޝިޕް އަދި ރާއްޖެ ތަރައްގީ ކުރެއްވުމަށް އެމަނިކުފާނު ދެއްވާ އަހައްމިއްޔަތުކަން. ރައީސް މުއިއްޒުގެ އެހީތެރިކަމާއި އެއްބާރުލުމަށް ވަރަށް ބޮޑަށް ޝުކުރު އަދާކުރަން.“ ޕެޓަރް ވިދާޅުވިއެވެ.

އައިލާ މޯލްޑިވްސްގައި ގާއިމްކުރާނެ ވަސީލަތްތަކުގެ ތަފްސީލު ދެއްވަމުން ކާސްޓިކް ވިދާޅުވީ އެތަނުގައި ހޮސްޕިޓަލިޓީ އެކަޑަމީ އަކާއި އެންމެ މަތީ ފެންވަރުގެ މެޑިކަލް ފެސިލިޓީއެއް ހިމެނޭނެ އެވެ. ހޮސްޕިޓަލިޓީ އެކަޑަމީ ހިންގާނީ އެ ހިދުމަތް ރަނގަޅު ފެންވަރެއްގައި ދޭ ބަޔަކާ ގުޅިގެން ކަމަށް ވެސް އޭނާ ވިދާޅުވި އެވެ.

ސްޕެޝަލް އިކޮނޮމިކް ޒޯން ގާނޫނަށް އެންމެ ފަހުން ގެނައި ބަދަލުގައި ތަސައްވުރު ކޮށްފައިވާ ގޮތަަށް ސަސްޓެއިނަބުލް ޓައުންޝިޕެއް ގާއިމްކުރަން ކްރިސްޓަލް ހޯލްޑިންގްސް އަށް ސަރުކާރުން ހުއްދަދިނީ 790 މިލިއަން ޑޮލަރު އިންވެސްޓްކުރާ ގޮތަށެވެ.

ޕްރޮޖެކްޓް އައިލާގެ އަމަލީ މަސައްކަތް ފެށުމުގެ ރަސްމިއްޔާތުގައި ކްރިސްޓަލް ހޯލްޑިންގްސް އިން ދެއްކި ވީޑިއޯ ޕްރެޒެންޓޭޝަންގައިވާ ގޮތުން ދިގު މުއްދަތަކަށް މީހުންނަށް ދިރިއުޅެވޭ  ރިއަލްއެސްޓޭޓް ވިޔަފާރީގެ ބައެއް އެ ޕްރޮޖެކްޓްގައި ހިމެނެ އެވެ. އެސްއީޒެޑް ގާނޫނުގައިވާ ގޮތަށް އެ ތަނުގައި ކަރަންޓްގެ 60 ޕަސެންޓް އުފައްދާނީ އިއާދަކުރަނިވި ހަކަތައިންނެވެ. އެ ތަނުގައި ޒަމާނީ ފެންވަރަަށް ދަނޑުވެރިކަން ކުރުމުގެ ވަސީލަތްތައް ވެސް ގާއިމްކުރާނެ ކަމަށް އެ ޕްރެޒެންޓޭޝަންގައި ބުންޏެވެ.