އެސްޓީއޯގެ ޑިރެކްޓަރުންގެ ބޯޑަށް ކުރިމަތިލުމަށް ހުޅުވާލައިފި

އެސްޓީއޯގެ ޑިރެކްޓަރުންގެ ބޯޑުގައި އާންމު ހިއްސާދާރުން ތަމްސީލުކުރުމަށް، ބޯޑަށް ކުރިމަތިލުމުގެ ފުރުސަތު މިއަދު ހުޅުވާލައިފިއެވެ.

އެސްޓީއޯ އިން މިއަދު ކުރި އިއުލާނެއްގައި ބުނީ ޑިރެކްޓަރުންގެ ބޯޑަށް ކުރިމަތިލުމަށް އެދި ހުށަހަޅާ ފޯމު އަދި ފޯމާއެކު ހުށަހަޅަންޖެހޭ ޑޮކިއުމަންޓްތައް ފުރިހަމަކުރުމަށްފަހު ފޮނުވަންޖެހޭނީ cs@sto.mv އަށް ނުވަތަ އެ ކުންފުނީގެ ވެބްސައިޓުގައި ހަދާފައިވާ ޕްލެޓްފޯމް މެދުވެރިކޮށް ކަމަށެވެ. އެ މަގާމަށް އަންހެނުން ކުރިމަތިލުމަށް އެސްޓީއޯ އިން ވަނީ ބާރު އަޅައިފައެވެ.

އެސްޓީއޯގެ ބޯޑަށް ކުރިމަތިލުމަށް ފޯމު ފޮނުވުމުގެ ސުންގަޑިއަކީ އަންނަ މަހުގެ 25 ގެ މެންދުރުފަހު 3:00 އެވެ.

އެ މަގާމަށް މެންބަރަކު އިންތިހާބުކުރާނީ އެސްޓީއޯގެ އަހަރީ އާންމު ޖަލްސާގައި ހިއްސާދާރުންގެ މެދުގައި ނަގާ ވޯޓަކުންނެވެ.

އެސްޓީއޯގެ ޑިރެކްޓަރުންގެ ބޯޑުގައި ހިމެނޭނީ އާންމު ހިއްސާދާރުން ތަމްސީލުކުރާ މެންބަރުގެ އިތުރުން، ސަރުކާރުން އައްޔަންކުރާ ހަ މެންބަރުންނެވެ.