ދަރީން ސްކޫލަށް ފޮނުވުމަކުން ޒިންމާ ނިމުނީއެއް ނޫނެވެ. ހިތްވަރުވެސް ދޭންޖެހެއެވެ.

ދަރީން މަދަރުސާއަށް ފޮނުވުމުން އެ ބެލެނިވެރީންގެ ޒިންމާ ނިމުނީ ނޫން ކަމަށާއި އެ ކުދީންނަށް ބޭނުންވާ ތަކެތި ހޯދައިދޭ ފަދައިން، އެ ކުދީންނަށް ހިތްވަރުދީ އިތުބާރު ވެސް ހޯދައިދޭންޖެހޭ ކަމަށް މިއަދުގެ ހުކުރު ހުތުބާގައި ބުނެފި އެވެ.

”ވަށައިޖެހޭ ތައުލީމުގެމަތީގައި އުންމަތް ބިނާކުރާށެވެ!“ މި މައުޟޫއުއަށް މިއަދު ދިން ހުކުރު ހުތުބާގައި ބުނީ, މިއީ އަހަރެމެންގެ ލޮބުވެތި ދަރީން، އާ އަޒުމަކާ އެކު ދިރާސީ އާ އަހަރުގެ ދަތުރު ފެށި ހަފުތާ ކަމަށާއި މިއީ އެ ދަރީންގެ މުސްތަގުބަލު ބިނާކުރުމުގެ އާ ބާބެއްގެ ފެށުން ކަމަށެވެ. އަދި މުދައްރިސުން، ދަރިވަރުންގެ ބުއްދި ތަރައްގީކޮށްދޭ ފަދައިން، އެ ކުދީންގެ ހިތްތަކުގައި އީމާންކަމާއި މަތިވެރި އަހުލާގުގެ ބިންގާ އަޅައިދިނުމަށާއި އެ ކުދީންގެ ޅަނދޮޅު ހިތްތަކަށް ރޫޙާނީ ދިރުން ގެނެސްދިނުމަށް ގޮވާލި އެވެ.

ދަރިވަރުންނަކީ ގައުމާއި އުންމަތުގެ އުންމީދުކަން ފާހަގަކޮށް ހުތުބާގައި ވަނީ އުގަންނައިދޭ މުދައްރިސުންނަށް އިހުތިރާމު ކުރުމަށާއި މަދަރުސާގެ އުސޫލުތަކަށް ހުރުމަތްތެރިކޮށްހިތުމަށާއި ވަގުތާއި މަސައްކަތްތައް ރާވާލުމަށާއި ބޭނުމެއް ނެތް ކަންކަމުގައި ވަގުތު ހޭދަނުކުރުމަށް ގޮވާލައިފަ އެވެ. އަދި އުނގެނުމުގެ މަގަކީ، ދިގު ބުރަ މަސައްކަތެއް ނަމަވެސް އެއީ ސުވަރުގެއަށް މަގު ފަހިކޮށްދޭ، އަޖުރު މަތިވެރި ޖިހާދެއް ކަމަށްވެސް ހުތުބާގައި ބުންޏެވެ.

ހުތުބާގައި މުދައްރިސުންނަށް ގޮވާލައި ބުނީ, އެ ބޭފުޅުންނަކީ އިލްމު އުނގަންނައިދިނުމުގެ މަތިވެރި ވަޒީފާ ހިޔާރުކުރައްވައިގެން ތިއްބެވި މުރައްބީން ކަމަށާއި އެއީ އިލްމާއި މައުރިފާގެ ނޫރުން ދަރިވަރުންގެ ހިތްތައް އަލިކޮށް ރޯޝަންކޮށްދޭ ދަންމަރުތަކެއް ކަމަށެވެ. އެހެންކަމުން ކޮންމެ މާއްދާއެއް ކިޔަވައިދިންކަމުގައި ވިޔަސް އިސްލާމްދީނުގެ އަސްލުތަކާއި ތަރަހައިގެ ތެރެއަށް ފެއްތުމަކީ މުދައްރިސުންގެ މަސްއޫލިއްޔަތެއް ކަމަށާއި އެއީ ނުހަނު ބޮޑު އަމާނާތެއް ކަމަށްވެސް ބުންޞެވެ.

ބެލެނިވެރިންނަށް ގޮވާލައި ހުތުބާގައި ބުނީ, ދަރިވަރުންގެ ސިއްހަތާއި އެ ކުދީންނަށް އަންނަ ޖިސްމާނީ އަދި ނަފުސާނީ ބަދަލުތަކަށް ހޭލުންތެރިކުރުވާ އެންމެ ގާތް އެކުވެރިޔާއަށް ވާންޖެހޭ ކަމަށެވެ. އަދި އާއިލީ ނުތަނަވަސްކަމާއި މުޖުތަމައުން ކުރިމަތިވާ ތުރާތަކުން ދަރީން ދުރުކޮށްދީ، އެ ކުދީން ރައްކާތެރިކޮށްދިނުމަށާއި ކާމިޔާބީގައި ބައިވެރިވެ، ތަރުހީބުދީ, ނާކާމިޔާބީގައި އަތުގައި ހިފައި، އާ އަޒުމަކާ އެކު ކުރިއަށްދާން ހިތްވަރު ދިނުމަށްވެސް ހުތުބާގައި ގޮވާލި އެވެ.

ހުތުބާގައި ބުނީ, އަހަރެމެންގެ ދަރީންނަށް އިލްމު އުނގަންނައިދީ އެ ކުދީންނަށް ދެ ދުނިޔޭގެ ފަލާހާއި ކާމިޔާބީ ހާސިލުވާނޭ މަގަށް ތަރުބިޔަތުކޮށްދޭ މުދައްރިސުންނަކީ މާތް ﷲގެ ހަޒުރަތުގައި މަތިވެރި ބައެއް ކަމަށެވެ. އަދި ތައުލީމީ ނިޒާމުގެ ތެރެއިން އަހަރެމެން ބިނާކުރާން މި އުންމީދުކުރާ ޖީލަކީ، އިހުލާސްތެރި, އަމާނާތްތެރި، އަދުލުވެރި، އިލްމުވެރި، ހުލްގު ހެޔޮ، ގައުމީ މަސްލަހަތު އިސްކުރާ، ހައްގަށް ތަބާވާނޭ އަދުލުވެރި ޖީލެއް ކަމަށްވެސް ބުންޏެވެ.