ވަކިކުރީ ގާނޫނީ ހަމަތަކުން ބޭރުން، އަބުރު ކަތިލުމުގެ ބޭނުމެއް ނެތް: ސާޖިދު 

ޖިންސީ ފުރައްސާރަކުރުމުގެ ތުހުމަތު ސާބިތުވެ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ) ގެ ވެރިޔާގެ މަގާމުން ވަކިކުރީ ގާނޫނީ ހަމައަކުން ނޫން ކަމަށް އެ މަގާމުން ވަކިކުރި އިސްމާއިލް ސާޖިދު ވިދާޅުވެއްޖެއެވެ.

އެފްއައިޔޫގެ އިސްވެރިޔާގެ މަގާމަށް ސާޖިދު އައްޔަންކުރީ މިދިޔަ އޮގަސްޓު މަހުއެވެ. އޭގެ ފަހުން ޖިންސީ ފުރައްސާރައިގެ ތުހުމަތާ ގުޅިގެން މިދިޔަ މަހު ސަސްޕެންޑުކުރުމަށްފަހު، މިދިޔަ ބުރާސްފަތި ދުވަހު އޭނާ ވަނީ މަގާމުން ވަކިކޮށްފައެވެ.

އެމްއެމްއޭ އިން ސާޖިދު މަގާމުން ވަކިކޮށްފައިވަނީ ޖިންސީ ފުރައްސާރަކުރި މައްސަލަ، އެމްއެމްއޭގެ ޖިންސީ ފުރައްސާރައިގެ މައްސަލަތައް ބަލާ ކޮމިޓީން ބަލައި، ސާޖިދުގެ މައްޗަށް މައްސަލަ ސާބިތުވާ ކަމަށް އެ ކޮމިޓީން ނިންމުމާ ގުޅިގެންނެވެ.

ސާޖިދު ފޭސްބުކްގައި މިއަދު ކުރެއްވި ޕޯސްޓެއްގައި ވިދާޅުވީ އޭނާ ފައިނޭންޝަލް އިންޓެލިޖެންސް ޔުނިޓުގެ ވެރިޔަކަށް ހުރުމުން އުނދަގޫވާ ފަރާތެއް ހުރި ނަމަ، ނުވަތަ ދަތިތަކެއް ކުރިމަތިވާ ނަމަ، ވަޒީފާއިން ވަކިވާން އޭނާ ކައިރީގައި ސީދާ ބުނި ނަމަ، ރީތިކޮށް އެކަން ކުރެވުނީސް ކަމަށާއި މީހެއްގެ އަބުރު ކަތިލުމުގެ އެއްވެސް ބޭނުމެއް ނެތް ކަމަށެވެ.

އެ މައްސަލައިގައި އޭނާއާ މެދު އަޅާފައިވާ ފިޔަވަޅަކީ ގާނޫނީ ހަމައިގެ މަތިން އަޅާފައިވާ ފިޔަވަޅެއް ނޫންކަން އެ މައްސަލައިގެ ތަފްސީލު ބެލި ކޮންމެ މީހަކަށްވެސް އެނގޭނެ ކަމަށް ސާޖިދު ވިދާޅުވިއެވެ.

ސާޖިދު ވިދާޅުވީ ޖިންސީ ފުރައްސާރައިގެ ތުހުމަތު ސާބިތުވާ ކަމަށް މައްސަލަ ބެލި ކޮމިޓީން ނިންމާފައިވަނީ މައްސަލަ ހުށަހެޅި ފަރާތުން ކަނޑައެޅިގެން ދޮގުތަކެއް ހަދާފައިވާކަން ސާބިތުވާނެ ހެކި އޭނާގެ ފަރާތުން ހުށަހަޅާފައި ވަނިކޮށް ކަމަށާއި ދޮގުތައް ސާބިތުކުރެވޭ މިންވަރަށް ކޮމިޓީއަށް ކިތާބީ ހެކި ހުށަހަޅާފައިވީ ނަމަވެސް މައްސަލަ ނިންމާފައިވަނީ އެ ހެކިތަކަށް އެއްވެސް މިންވަރަކަށް ބެލުމެއް ނެތި ކަމަށެވެ.

މައްސަލަ ހުށަހެޅި މަގުސަދާ މެދު ސަބަބުވެރި އިންސާނަކަށް ސުވާލު އުފެދޭ ހާލަތްތަކެއް މައްސަލައިގައި ހުށަހަޅާފައިވާ ކަމަށާއި އެގޮތުން އެފްއައިޔޫގެ މުވައްޒަފެއްގެ ހައިސިއްޔަތުން އެ މުވައްޒަފު ކޮށްގެން ނުވާނެ ބައެއް ކަންކަން އެ މުވައްޒަފު ކުރުމުން އެ މުވައްޒަފާ މެދު އަމަލު ކުރަންޖެހޭ ގޮތަށް އަމަލުކުރުމަކީ މިއަދު އެ އަނިޔާ ލިބުމުގެ އެއް އަސާސް ކަމަށް ބެލެވޭ ކަމަށް އޭނާ ވިދާޅުވިއެވެ.

ސާޖިދު ވިދާޅުވީ ހުށަހަޅާފައިވާ މައްސަލައިގައި ބުނާ ކަންކަން ހިނގި ދުވަސްތަކާއި މައްސަލަ ހުށަހެޅި ދުވަހާ ދެމެދު 39 ދުވަސް ހިނގާފައިވާ ކަމަށާއި އެ މުއްދަތުތަކުގެ ތެރޭގައި ހިނގާފައިވާ ކަންކަން އިދާރާގެ ލިޔެކިޔުންތަކުންނާއި އެހެނިހެން ހެކިތަކުން އެނގޭ ކަމަށެވެ.

އެ މައްސަލައިގެ އެއްވެސް ތަފްސީލެއް ނުލިބެނީސް އެކަމުގެ މައުލޫމާތުތަކެއް އެމްއެމްއޭގެ މުވައްޒަފެއް ދިން ކަމަށް މީޑިއާ ރިޕޯޓުތަކަށް ބެލުމުން އެނގޭ ނަމަވެސް، އެފަދަ އެއްވެސް މައުލޫމާތެއް މިހާތަނަށް އެއްވެސް މީޑިއާއަކަށް އޭނާ ދީފައެއް ނުވާނެ ކަމަށްވެސް ވިދާޅުވިއެވެ.