އަދާލަތުގެ ރައީސަކަށް ޝިފާން 

އަދާލަތު ޕާޓީގެ ރައީސަކަށް، އެ ޕާޓީގެ ނައިބު ރައީސްކަމުގެ މަގާމު ފުރުއްވަމުންގެންދަވާ ޝައިހް މުހައްމަދު ޝިފާން އިންތިހާބުވެއްޖެއެވެ.

އަދާލަތު ޕާޓީގެ ރައީސާއި ނައިބު ރައީސް ހޮވުމަށް މިއަދު އިންތިހާބު ބާއްވާފައިވަނީ ފަހި އެޕްލިކޭޝަން މެދުވެރިކޮށް އޮންލައިންކޮށެވެ.

އެ އިންތިހާބުގައި 99 ޕަސަންޓު މީހުން ރައީސަކަށް ޝައިހް ޝިފާނަށް ވޯޓު ދިން އިރު، އޭނާއާ ވާދަކުރެއްވި ޑރ. އިކްރާމް އަބްދުއްސައްތާރަށް ލިބިވަޑައިގެންނެވީ އެއް ޕަސަންޓު ވޯޓެވެ.

އިންތިހާބުގައި ވޯޓުލާފައިވަނީ ވޯޓުލުމުގެ ހައްގު ލިބިފައިވާ މީހުންގެ 22 ޕަސަންޓު މީހުންނެވެ. ޕަސަންޓޭޖު ވޯޓު އަދާލަތުން އިއުލާންކުރި ނަމަވެސް ވޯޓުލީ މީހުންގެ އަދަދުތައް ހާމަކޮށްފައެއް ނުވެއެވެ.

އަދާލަތު ޕާޓީގެ ނައިބު ރައީސަކަށް އިންތިހާބުވެފައިވަނީ، ޝައިހް ޝިފާންގެ ރަނިންމޭޓު ޝައިހް އަބްދުﷲ ރަޝީދެވެ. ނާކާމިޔާބުވެފައިވަނީ އިކްރާމްގެ ރަނިމޭޓް މުހައްމަދު މުއްތަލިބަށެވެ.

އަދާލަތު ޕާޓީގެ އެ އިންތިހާބުގެ ކުރިން ވަނީ މައްސަލަތަކެއް ފެންމަތިވެފައެވެ. އެއީ އޮންލައިންކޮށް ވޯޓުލާން ނިންމި މައްސަލައާ ގުޅިގެންނެވެ. އެ މައްސަލައިގައި ރައީސަކަށް ވާދަކުރެއްވި ޑރ. އިކްރާމް އަބްދުއްސައްތާރު ވަނީ އިލެކްޝަންސް ކޮމިޝަން (އީސީ) އަށް ވެސް މައްސަލަ ހުށަހަޅުއްވައިފައެވެ.

އަދާލަތުގެ ރައީސަކަށް މިހާރު ހުންނެވީ ކުރީގެ ހޯމް މިނިސްޓަރު ޝައިހް އިމްރާން އަބްދުﷲ އެވެ. އާ އިންތިހާބެއް ބާއްވާފައި މިވަނީ، ރައީސާއި ނައިބު ރައީސްގެ ދައުރު ހަމަވާތީއެވެ.