ޕާކިސްތާނުގެ ވަރުގަދަ ވައިގެ ހަމަލާތަކެއް އަފްޣާނިންތާނަށް

މީގެ އިތުރުން މި މަހުގެ ކުރީކޮޅު ޕާކިސްތާނުގެ ވެރިރަށުގައި ދިން ޖާނުން ފިދާވުމުގެ ހަމަލާގެ ޒިންމާ އުފުލާފައިވާ، އައިއެސްގެ ގޮފި ކަމަށްވާ އައިއެސް-ކޭޕީ ނުވަތަ ޚުރާސާން ޕްރޮވިންސްގެ ހަނގުރާމަވެރިންނަށް އަމާޒުކޮށްވެސް މި އޮޕަރޭޝަންގައި ހަމަލާދީފައިވާ ކަމަށް މިނިސްޓްރީން ބުނެފައިވެއެވެ.

ޕާކިސްތާނުގެ މިނިސްޓްރީން ހާމަކުރި ގޮތުގައި، އިސްލާމްއާބާދާއި، ހުޅަނގު އުތުރުގެ ބާޖޫރު އަދި ބައްނޫ ޑިސްޓްރިކްޓަށް ދާދިފަހުން ދިން ހަމަލާތަކަކީ އަފްޣާނިސްތާނުގައި ތިބި އެ ޖަމާއަތްތަކުގެ އިސްވެރިންގެ އިރުޝާދުގެ ދަށުން ދީފައިވާ ހަމަލާތަކެއް ކަމުގެ ”ސާފު ހެކި“ އެ ގައުމަށް ވަނީ ލިބިފައެވެ.

އަފްޣާނިސްތާނުގެ ޑިފެންސް މިނިސްޓްރީން ވަނީ، ސަރަހައްދީ ރަށްތައް ކަމަށްވާ ނަންގަރްހާރު އަދި ޕަކްތިކާގައި ހުންނަ ދީނީ މަދަރުސާއަކަށާއި އާންމުން ދިރިއުޅޭ ގެތަކަށް އަމާޒުކޮށް ދިން ހަމަލާތައް ހަރުކަށި އިބާރާތުން ކުށްވެރިކޮށްފައެވެ. މި ހަމަލާތަކުގައި އަންހެނުންނާއި ކުޑަކުދިން ހިމެނޭހެން އެތައް ބަޔަކު މަރުވެ، ގިނަ ބަޔަކަށް އެކިވަރުގެ އަނިޔާތައް ލިބިފައިވާ ކަމަށެވެ.

މީގެ އިތުރުން، އެ ހަމަލާތަކަކީ ބައިނަލްއަގުވާމީ ގާނޫނުތަކާއި އަވަށްޓެރި ގައުމުތަކުގެ މެދުގައި އޮންނަންޖެހޭ ރީތި އުސޫލުތަކާ ހިލާފަށް ދިން ހަމަލާތަކެއްގެ ގޮތުގައި ސިފަކޮށް، އެކަމަށް ރައްދު ދޭނެ ކަމުގެ އިންޒާރުވެސް އަފްޣާނިސްތާނުގެ ޑިފެންސް މިނިސްޓްރީން ވަނީ ދީފައެވެ.

އެ މިނިސްޓްރީން ނެރުނު ބަޔާނުގައި ބުނެފައިވަނީ، ”އާންމު ރައްޔިތުންނާއި ދީނީ މަރުކަޒުތަކަށް އަމާޒުކޮށް ދިން މި ހަމަލާތަކުގެ ފުރިހަމަ ޒިންމާ ޕާކިސްތާނުގެ އަސްކަރިއްޔާއިން އުފުލަން ޖެހޭނެ“ ކަމަށެވެ. އަދި އެކަށީގެންވާ ވަގުތެއްގައި، މިކަމަށް މުނާސަބު އަދި ހަމަހަމަ ރައްދެއް ދޭނެ ކަމަށްވެސް އެ ބަޔާނުގައި ބުނެފައިވެއެވެ.