ހެކި ނެތް ކަމަށްބުނެ، ނަދީމްގެ މައްޗަށް ދައުވާނުކުރުމަށް ނިންމައިފި  

އިތުރު ބަޔަކު ބައިވެރިގެން އައްޑޫ ސިޓީގައި ފުޅާ ދާއިރާއަކަށް މަސްތުވާތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާ ލޯންޑަރކުރާކަމަށް ތުހުމަތުކުރެވޭ މައްސަލައިގައި ހައްޔަރުކުރި އަލީ ނަދީމްގެ މައްޗަށް ހެކި ނެތް ކަމަށްބުނެ، އޭނާއަށް ދައުވާނުކުރަން ނިންމައިފިއެވެ.

ޕްރޮސިކިއުޓާ ޖެނެރަލް (ޕީޖީ) އޮފީހުން މިރޭ ބުނީ ސ. ހިތަދޫ، ކޮންމުލި، އަލީ ނަދީމާއި އިތުރު ބަޔަކު ބައިވެރިގެން އައްޑޫ ސިޓީގައި ފުޅާ ދާއިރާއަކަށް މަސްތުވާތަކެތި ވިއްކައި ވިޔަފާރިކޮށް، އެކަމުން ހޯދާ ފައިސާ ލޯންޑާކުރާކަމަށް ތުހުމަތުކުރެވޭ މައްސަލައިގެ ތަހުގީގު މުއްދަތު މިއަދުގެ ނިޔަލަށް ހަމަވެފައިވާ ކަމަށެވެ.

އަލީ ނަދީމްގެ އިތުރުން އެ މައްސަލައިގައި ތުހުމަތުކުރެވެނީ:

• ސ. ހިތަދޫ، ވެޔޮފެހެބުރުގެ، އިބްރާހީމް ސިރާޖް
• ސ. ހިތަދޫ، ދޮރުފޮތިމާގެ، ހަސަން އަލްފާފު
• ސ. ހިތަދޫ، ކެކުރިމާގެ، އަމީން މުހައްމަދު
• ސ. ހިތަދޫ، ލޮބްސްޓަމް، ސަލާމް ސައީދު
• ސ. ހިތަދޫ، ފަލާޙް، ހާފިޒް ފައުޒީ
• ދ. ހުޅުދެލި، އަންބަރީގެ، ޒަހްނާ އަހުމަދު

އެ މައްސަލައިގައި މައިގަނޑު ދެ ތުހުމަތެއް ކުރެއެވެ. އެއީ ކުށް ކުރާ ޖަމާއަތެއްގައި ބައިވެރިވުމުގެ ކުށާއި މަނީ ލޯންޑަރިންގެ ކުށެވެ.

ޕީޖީން ބުނީ މައްސަލަ ތަހުގީގުކުރުމަށް ގާނޫނުގައި ކަނޑައެޅިފައިވާ މުއްދަތު ހަމަވުމާ ހަމައަށް ލިބިފައިވާ ހެކި ގަރީނާ ވަޒަންކޮށް ބެލި އިރު، އެ މައްސަލައިގައި ތުހުމަތުކުރެވޭ މީހުން، ކުށްކުރާ ޖަމާއަތެއްގައި ބައިވެރިވިކަން ނުވަތަ މަނީ ލޯންޑަރކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ގަރީނާ ލިބިފައި ނުވާ ކަމަށެވެ.

އެ މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން ވާނީ އިތުރުކޮށްދީފައި ކަމަށާއި ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަކުރެވި، ދައުވާކުރެވޭ މިންވަރަށް ހެކި ގަރީނާ ހޯދިފައި ނުވާ ކަމަށް ޕީޖީން ބުންޏެވެ.

ޕީޖީން ބުނީ ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ކ) ގައި، ތަހުުގީގުކުރުމަށް ކަނޑައެޅިފައިވާ މުއްދަތުގެ ތެރޭގައި ދައުވާކުރެވޭ މިންވަރަށް ހެކި ލިބިފައިނުވާނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަންވާނެ ކަމަށް ބަޔާންކޮށްފައިވާ ކަމަށެވެ. އެހެންކަމުން، އެ ނިންމުމާއެކު މައްސަލައިގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ފުލުހުންނަށް ލަފާދީފައިވާނެ ކަމަށް ޕީޖީން ބުންޏެވެ.

އެ މައްސަލައިގައި ދައުވާކުރެވޭ މިންވަރަށް މިވަގުތަށް ހެކި ގަރީނާ ލިބިފައި ނުވާތީ މައްސަލަ ޑިކްލައިންކުރި ނަމަވެސް، އާ ހެކި ލިބިއްޖެ ހާލަތެއްގައި، ޖިނާއީ އިޖުރާއަތުގެ ގާނޫނުގެ 94 ވަނަ މާއްދާގެ (ވ) ގެ ދަށުން އަލުން ދައުވާކުރުމަށް އެދި ހުށަހެޅުމަށް ފުލުހުންނަށް ލަފާދީފައިވާނެ ކަމަށް ޕީޖީން ބުންޏެވެ.